واشنگٹن (لارڈ میڈیا): ناسا کے پرزیورینس روور نے مریخ کی چٹانوں میں پیچیدہ کاربن مالیکیولز دریافت کیے ہیں، جو ممکنہ طور پر قدیم خردبینی زندگی کے نشانات ہو سکتے ہیں۔ روور کے شرلوک آلے نے برائٹ اینجل آؤٹ کراپ کی مٹی پتھریلی چٹانوں میں نامیاتی کاربن کی موجودگی کی پیمائش کی ہے، جو نیریٹوا ویلس کے قریب ہے، جہاں کبھی دریا بہتا تھا۔
دریافت ہونے والے کاربن کی یہ شکل میکرو مالیکیولر کاربن (ایم ایم سی) کہلاتی ہے، جو بعض اوقات زندہ جانداروں سے بھی وجود میں آ سکتی ہے۔ تاہم، ماہرین کے مطابق یہ مادہ جغرافیائی عمل کے نتیجے میں بھی بن سکتا ہے، اس لیے اس کی موجودگی کو مریخ پر ماضی کی زندگی کے حتمی ثبوت کے طور پر قبول نہیں کیا جا سکتا۔
ایریزونا کے پلینیٹیری سائنس انسٹیٹیوٹ کی ڈاکٹر ایشلے مرفی نے کہا کہ ایم ایم سی مختلف اقسام کے ماحول اور چٹانوں میں پایا جا سکتا ہے۔ یہ حیاتیاتی ذرائع سے بھی بن سکتا ہے یا پانی اور چٹانوں کے تعامل سے بھی پیدا ہو سکتا ہے۔
برائٹ اینجل آؤٹ کراپ کی یہ مٹی پتھریلی چٹانیں 2024 میں اس وقت توجہ کا مرکز بنی تھیں جب روور کو ان کی سطح پر دلچسپ دھبے اور نوڈلز ملے جو زمین پر فوسلائزڈ جرثوموں سے ملتے جلتے ہیں۔ ناسا کے سابق سربراہ شان ڈفی نے کہا کہ یہ مریخ پر زندگی کا سب سے واضح اشارہ ہو سکتا ہے، لیکن سائنس دانوں کا کہنا ہے کہ یہ دریافت فی الحال حتمی ثبوت نہیں ہے۔
