میکسیکو (لارڈ میڈیا): میکسیکو اور ٹیکساس کے دریاؤں میں پائی جانے والی چھوٹی اور چمکدار ایمیزون مولی مچھلی نے سائنسدانوں کو حیران کر دیا ہے۔ یہ مچھلی پچھلے ایک لاکھ سال سے نر کے بغیر صرف ماؤں کے ذریعے ہی نسل چلا رہی ہے۔ سائنسدانوں کا خیال تھا کہ نر کے بغیر جاندار جلد ختم ہو جاتے ہیں، مگر یہ مچھلی نہ صرف زندہ ہے بلکہ خوشحال بھی ہے۔
بی بی سی کی رپورٹ کے مطابق، اس مچھلی کی مائیں بچے پیدا کرنے کے لیے دوسری نر مچھلیوں کے پاس جاتی ہیں لیکن ان کے ڈی این اے کو استعمال نہیں کرتیں، بلکہ اسے انڈے کو بیدار کرنے کے لیے استعمال کرتی ہیں۔ پیدا ہونے والے بچے صرف بیٹیاں ہوتی ہیں، جو اپنی ماں کی کلون ہوتی ہیں۔
جرمنی کے سائنسدان ایڈورڈ رائسمائیر نے تحقیق میں بتایا کہ یہ مچھلی جینیاتی نقص کو دور کرنے کا نظام رکھتی ہے، جو کمپیوٹر کی طرح خرابیوں کو ٹھیک کرتا ہے۔ جب بھی ڈی این اے میں نقص پیدا ہوتا ہے، تو مچھلی کا جسم اچھی جینیاتی کاپی کو دیکھ کر نقص کو ٹھیک کر دیتا ہے۔
نیدر لینڈز کے سائنسدان ڈیو اسپائیر کا کہنا ہے کہ قدرت نے غلطیوں کو سدھارنے کے طریقے وضع کیے ہیں۔ بغیر نر کے جانداروں نے ان غلطیوں سے بچنے کا اپنا راستہ ڈھونڈ لیا ہے۔
سائنسدانوں کے مطابق، اس مچھلی کے نظام کو سمجھنے سے انسانوں میں کینسر جیسی بیماریوں کے علاج میں مدد مل سکتی ہے۔ یہ مچھلی قدرت کے وسیع راستوں کی مثال ہے۔
