گزشتہ چند ہفتوں سے ویتنام میں گرمی کی طویل لہر جاری ہے جس کے باعث کئی علاقوں میں درجہ حرارت 40 ڈگری سینٹی گریڈ سے تجاوز کر گیا ہے۔ اس صورتحال میں شہری گرمی سے بچنے کے لئے پناہ کی تلاش میں ہیں۔ گھر سے باہر کام کرنے والے افراد کو سخت حالات کا سامنا کرنا پڑ رہا ہے جبکہ ملک بھر میں بجلی کی طلب میں نمایاں اضافہ ہوا ہے۔
بہت سے خاندانوں کے لئے شدید گرمی نے روزمرہ معمولات کو بدل کر رکھ دیا ہے۔
وزارتِ صحت کی ہدایت کے مطابق شہری صبح 10 بجے سے شام 4 بجے تک بیرونی سرگرمیوں سے گریز کر رہے ہیں۔ہنوئی کے ہا ڈونگ وارڈ کی رہائشی تران تھان ہوئین نے بتایا کہ اب وہ اور ان کے شوہر سورج نکلنے سے پہلے کھیلوں کی سرگرمیاں کرتے ہیں جبکہ ان کے بچوں کی فٹبال ٹریننگ کے لئے شام کا وقت مقرر کیا گیا ہے تاکہ وہ گرمی کی شدت سے محفوظ رہیں۔
ساؤنڈ بائٹ 1 (ویتنامی): تران تھان ہوئین، مقامی رہائشی، ہنوئی
”میں ان گرمیوں کے بارے میں یہی کہوں گی کہ یہ گھٹن زدہ، دم گھونٹ دینے والی اور برداشت سےباہر ہے۔
شدید گرمی کے دوران ہم دن میں ایئرکنڈیشنر کا کافی زیادہ استعمال کرتے ہیں۔ خاص طور پر اس گرمی میں جب بچے گھر پر ہوتے ہیں تو وہ زیادہ وقت گھر کے اندر ہی گزارتے ہیں۔ اس لئےایئرکنڈیشنر دن رات چلتا رہتا ہے۔
یہی وجہ ہے کہ بجلی کا بل کافی بڑھ گیا ہے۔ پچھلے ماہ کا بل گزشتہ مہینے کے مقابلے میں ڈیڑھ سے دو گنا زیادہ تھا۔“
ان کا تجربہ ایک ملک گیر رجحان کی عکاسی کرتا ہے کیونکہ بڑھتے ہوئے درجہ حرارت نے بجلی کی کھپت کو غیر معمولی سطح تک پہنچا دیا ہے۔
ملک کے پاور سسٹم نے 26 مئی کو دوپہر ایک بج کر 40 منٹ پر بجلی کی اب تک کی بلند ترین لوڈ سطح 58103 میگاواٹ ریکارڈ کی جو سال 2025 میں قائم ہونے والے ریکارڈ کے مقابلے میں 5.7 فیصد زیادہ ہے۔ دوسری جانب بجلی کی یومیہ پیداوار 1.212 ارب کلو واٹ آور کی ریکارڈ سطح تک پہنچ گئی جو گزشتہ برس کی بلند ترین سطح سے 9.1 فیصد زیادہ ہے۔
شمالی ویتنام میں جہاں گرمی کی لہر خاص طور پر شدید رہی وہاں بھی نئے ریکارڈ قائم ہوئے۔اسی روز دوپہر ایک بج کر 20 منٹ پر زیادہ سے زیادہ لوڈ 29716 میگاواٹ تک پہنچ گیا جبکہ بجلی کی یومیہ پیداوار 60 کروڑ 29 لاکھ کلو واٹ آور ریکارڈ کی گئی۔ اس دن ملک کی مجموعی بجلی کھپت میں اس خطے کا حصہ 51.9 فیصد رہا۔
بجلی کی فراہمی کو یقینی بنانے کے لئے ملک بھر کے پاور پلانٹس نے اپنی پیداوار تقریباً مکمل صلاحیت تک بڑھا دی ہے۔ ان پلانٹس میں جنوبی صوبے لام ڈونگ میں چینی سرمایہ کاری سے قائم کیا گیا ونھ تان فیز 1 بی او ٹی پاور پلانٹ بھی شامل ہے۔
دارالحکومت میں جہاں دوپہر کے بعد بھی درجہ حرارت 38 ڈگری سینٹی گریڈ سے اوپر رہا شہریوں نے گرمی سے بچنے کے لئے تمام ممکنہ طریقے اختیار کئے۔
ویٹ ہنگ وارڈ میں دیونگ دریا کے کنارے رنگ برنگے سوئمنگ رِنگز پانی پر بکھرے نظر آئے جہاں مختلف عمر کے افراد شدید گرمی سے نجات کے لئے دریا میں اتر آئے۔
ساؤنڈ بائٹ 2 (ویتنامی): نگوین تھی تھوئی نگا، مقامی رہائشی، ہنوئی
”ہنوئی میں حالیہ گرمی کی لہر بہت شدید رہی ہے۔ واقعی بہت زیادہ گرمی ہے۔ چونکہ میں دریا کے قریب رہتی ہوں اس لئے میں یہاں آ کر ٹھنڈک حاصل کرتی ہوں۔ اس سے نہ صرف مجھے گرمی سے نجات ملتی ہے بلکہ ورزش کرنے اور صحت مند رہنے کا موقع بھی ملتا ہے۔“
ہنوئی، ویتنام سے شِنہوا نیوز ایجنسی کے نمائندوں کی رپورٹ
