واشنگٹن (شِنہوا) ٹرمپ انتظامیہ امریکی کار ساز اداروں اور صنعتی کمپنیوں پر زور دے رہی ہے کہ وہ اسلحہ سازی میں اپنے کردار کو وسعت دیں۔
وال سٹریٹ جرنل میں شائع ہونے والی رپورٹ میں معاملے سے باخبر ذرائع کے حوالے سے بتایا گیا ہے کہ سینئر دفاعی حکام نے معروف کار ساز کمپنیوں، جن میں جنرل موٹرز اور فورڈ بھی شامل ہیں، کے ساتھ بات چیت کی ہے تاکہ ہتھیاروں اور فوجی سازوسامان کی پیداوار بڑھانے کے امکانات کا جائزہ لیا جا سکے۔
فی الحال ملک میں فوجی پیداوار چند ٹھیکیداروں کے ہاتھ میں ہے۔ اگرچہ دفاعی شعبے سے باہر امریکہ کی کئی بڑی مینوفیکچرنگ کمپنیوں کے پینٹاگون کے ساتھ معاہدے موجود ہیں، لیکن یہ معاہدے عموماً محدود نوعیت اور قدر کے ہوتے ہیں اور مخصوص مصنوعات یا تحقیق تک محدود رہتے ہیں۔
ذرائع کے مطابق یہ بات چیت ایران تنازع کے آغاز سے پہلے ہی شروع کر دی گئی تھی۔ جنگ کے باعث امریکہ کے اسلحہ کے ذخائر پر پڑنے والا دباؤ اس بات کی نشاندہی کرتا ہے کہ فوج کو اپنے تجارتی شراکت داروں کے نیٹ ورک کو وسعت دینے کی اشد ضرورت ہے تاکہ میزائلوں اور اینٹی ڈرون نظام جیسے اہم گولہ بارود اور جدید حربی سازوسامان کی پیداوار میں تیزی لائی جا سکے۔
قانون سازوں اور پینٹاگان کے اعلیٰ حکام کو امریکہ کی اسلحہ سازی کی صلاحیت پر گہری تشویش لاحق ہے، خاص طور پر اس کے بعد جب 2022 میں امریکہ اور اس کے نیٹو اتحادیوں نے یوکرین کو بڑی مقدار میں اسلحہ فراہم کرنا شروع کیا۔
ان بڑھتے ہوئے چیلنجز کے جواب میں پینٹاگان نے 15 کھرب امریکی ڈالر کے ریکارڈ بجٹ کی تجویز پیش کی ہے جس کا مقصد گولہ بارود اور ڈرونز کی پیداوار کی صلاحیت کو نمایاں طور پر بڑھانا ہے۔
