واشنگٹن (شِنہوا) امریکی فوج نے مشرقی بحرالکاہل میں مبینہ طور پر منشیات سمگلنگ میں ملوث ایک کشتی کو نشانہ بنایا جس میں سوار 4 افراد ہلاک ہو گئے۔ یہ اس نوعیت کی کارروائیوں کا مسلسل تیسرا دن تھا۔
امریکی سدرن کمانڈ کے مطابق انٹیلی جنس معلومات سے تصدیق ہوئی کہ یہ کشتی مشرقی بحرالکاہل میں منشیات سمگلنگ کے معروف راستوں پر سفر کر رہی تھی اور اس سرگرمی میں ملوث تھی۔
بیان میں کہا گیا کہ اس کارروائی کے دوران 4 مرد ہلاک ہوئے۔ کوئی بھی امریکی فوجی اہلکار زخمی نہیں ہوا۔ تاہم کشتی کے منشیات لے جانے کے ثبوت فراہم نہیں کئے گئے۔
امریکی افواج نے گزشتہ 2 دنوں کے دوران بھی مشرقی بحرالکاہل میں منشیات سمگلنگ میں ملوث 2 مشتبہ کشتیوں کو بھی تباہ کیا جن میں مجموعی طور پر 7 افراد ہلاک ہوئے۔
رپورٹ کے مطابق ستمبر کے اوائل سے اب تک امریکی فوج تقریباً 50 فضائی حملے کر چکی ہے جن میں منشیات سمگلنگ میں ملوث مشتبہ کشتیوں کو نشانہ بنایا گیا اور کم از کم 174 افراد ہلاک ہوئے۔
