واشنگٹن (شِنہوا) امریکی صدر ڈونلڈ ٹرمپ نے کہا ہے کہ ان کی انتظامیہ شکاگو، لاس اینجلس اور پورٹ لینڈ سے نیشنل گارڈ کو واپس بلا رہی ہے۔ یہ اعلان امریکی سپریم کورٹ کی جانب سے انتظامیہ کے خلاف فیصلے کے چند دن بعد سامنے آیا ہے۔
ٹرمپ نے ٹروتھ سوشل پر لکھا کہ ہم شکاگو، لاس اینجلس اور پورٹ لینڈ سے نیشنل گارڈ کو ہٹا رہے ہیں حالانکہ ان عظیم محب وطن افراد کی موجودگی کے باعث ان شہروں میں جرائم میں نمایاں کمی آئی ہے اور یہی حقیقت ہے۔ اگر وفاقی حکومت مداخلت نہ کرتی تو پورٹ لینڈ، لاس اینجلس اور شکاگو تباہ ہو چکے ہوتے۔
ٹرمپ نے مزید کہا کہ جب جرائم دوبارہ تیزی سے بڑھیں گے تو ممکن ہے ہم بالکل مختلف اور کہیں زیادہ سخت صورت میں واپس آئیں گے۔ انہوں نے ان علاقوں کے ڈیموکریٹ میئرز اور گورنرز کو “انتہائی نااہل” قرار دیا۔
یہ اعلان اس امر کے چند دن بعد کیا گیا جب سپریم کورٹ نے شکاگو میں امریکی امیگریشن اینڈ کسٹمز انفورسمنٹ (آئی سی ای) کے ایجنٹس کے تحفظ کے لئے نیشنل گارڈ بھیجنے کے ٹرمپ کے منصوبے کو روک دیا تھا۔
ٹرمپ کا موقف ہے کہ ڈیموکریٹس کے زیر انتظام علاقوں میں بڑھتے ہوئے جرائم کی وجہ سے نیشنل گارڈ کی تعیناتی ضروری ہے جبکہ ڈیموکریٹس نے ایسے اقدامات کے پیچھے سیاسی محرکات پر سوال اٹھائے ہیں۔
