بالی ووڈ کی لیجنڈری اداکارہ ہیما مالنی نے کہا ہے کہ دھرم جی نے کبھی خود کو دوسروں سے الگ نہیں سمجھا، وہ زندگی بھر عظیم شخصیت کے مالک رہے، امیر غریب جاننے والے اجنبی سب سے محبت، عزت اور وقار کیساتھ بات کی یہی انکی شخصیت تھی۔
انہوں نے دہلی میں اپنے شوہر اور فلمسٹارے دھرمیندر کے اعزاز میں دعائیہ تقریب سے جذباتی خطاب کرتے ہوئے آنسوں کو قابو میں رکھنے کی کوشش کی اور کہا میری ان کیساتھ وابستگی 57 سال پر محیط ہے جب میں فلم انڈسٹری میں آئی تو زیادہ تر کام انہی کیساتھ کیا، ہم تقریبا 45 فلموں میں ساتھ کام کر چکے ہیں جس میں سے 25 سپر ہٹ ہوئیں، انڈسٹری نے ہمیں کامیاب سکرین جوڑی کے طور پر پسند کیا اور شائقین نے بے پناہ محبت دی، دھرم جی نے 300 سے زائد فلموں میں بیشمار کردار ادا کئے اور ہر کردار میں کامیاب رہے، مگر کامیڈی انکا اصل شوق تھا، کیمرے کے سامنے وہ زندہ ہو جاتے تھے اور جو بھی کردار ملے، اس میں جان ڈال دیتے تھے، وقت کیساتھ انکی شخصیت کا ایک چھپا ہوا پہلو سامنے آیا وہ شاعری لکھنے لگے، انکی خاص خوبی یہ تھی کہ وہ ہر موقع پر الفاظ کیساتھ حاضر رہتے تھے، میں اکثر کہتی تھی کہ انہیں کتاب لکھنی چاہئے، شائقین ضرور پسند کرتے، وہ اس کام کے بارے میں بہت سنجیدہ تھے مگر وہ کام ادھورا رہ گیا۔
