شنگھائی(شِنہوا)8 ویں چین بین الاقوامی درآمدی نمائش (سی آئی آئی ای) پیر کے روز اختتام پذیر ہو گئی جس میں ایک سالہ مجوزہ سودوں کی مالیت 83.49 ارب امریکی ڈالر ریکارڈ کی گئی جو گزشتہ نمائش کے مقابلے میں 4.4 فیصد زیادہ اور ایک نیا ریکارڈ ہے۔
چین بین الاقوامی درآمدی نمائش بیورو کے مطابق نمائش میں کاروباری نمائش کا رقبہ 3 لاکھ 67 ہزار مربع میٹر سے زائد تھا جس میں 138 ممالک اور خطوں سے 4 ہزار 108 کمپنیوں نے حصہ لیا، یہ دونوں لحاظ سے ایک نیا ریکارڈ ہے۔
سی آئی آئی ای بیورو کے ڈپٹی ڈائریکٹر جنرل وو ژینگ پھنگ نے کہا کہ شرکاء میں 290 فارچیون گلوبل 500 کمپنیاں اور صنعت کے رہنما شامل تھے۔ ان میں 180 کمپنیاں پہلی سی آئی آئی ای سے اب تک تمام 8 نمائشوں میں حصہ لے چکی ہیں۔
6 روزہ نمائش میں 461 نئی مصنوعات، ٹیکنالوجیز اور خدمات پیش کی گئیں جن میں 201 عالمی سطح کی رونمائی، 65 ایشیائی پریمیئرز اور 195 چینی لانچز شامل ہیں جو بائیومیڈیسن، تکنیکی آلات اور ماحول دوست و کم کاربن ٹیکنالوجی جیسے شعبوں پر محیط ہیں۔
8 ویں سی آئی آئی ای میں 43 تجارتی وفود اور 700 سے زائد ذیلی وفود شامل ہوئے جبکہ رجسٹرڈ شرکاء کی تعداد 4 لاکھ 60 ہزار سے زائد رہی، جو گزشتہ سال کے مقابلے میں 7 فیصد زیادہ ہے۔
نائب وزیر تجارت شینگ چھیو پھنگ کے مطابق چین مسلسل 16 سال سے دنیا کی دوسری بڑی درآمدی مارکیٹ ہے اور 14 ویں 5 سالہ منصوبے (2021-2025) کے دوران چین کی مصنوعات اور خدمات کی درآمد 150 کھرب امریکی ڈالر سے تجاوز کرنے کی توقع ہے۔
2018 میں دنیا کی پہلی قومی سطح کی درآمدی نمائش کے طور پر شروع کی گئی سی آئی آئی ای کا مقصد چین کے کھلے پن کو بڑھانا اور اس کی وسیع مارکیٹ کو عالمی مواقع میں تبدیل کرنا تھا۔ 9 ویں سی آئی آئی ای کی تیاریوں کا کام تیزی سے جاری ہے اور اس کی متعلقہ کاروباری نمائش کی 80 ہزار مربع میٹر سے زائد جگہ پہلے ہی بک ہو چکی ہے۔
