کینبرا (شِنہوا) آسٹریلوی وزیرِ اعظم انتھونی البانیز نے کہا ہے کہ ان کی حکومت امریکی گائے کے گوشت کی درآمدات پر پابندی اٹھانے پر غور کرتے ہوئے حیاتیاتی تحفظ کے قوانین میں نرمی نہیں کرے گی۔آسٹریلین براڈکاسٹنگ کارپوریشن (اے بی سی)اور نائن انٹرٹینمنٹ کے اخبارات نے جمعہ کو رپورٹ کیا کہ البانیز کی لیبر پارٹی حکومت امریکی ٹیکسز سے استثنیٰ حاصل کرنے کے مذاکرات میں کچھ امریکی ذبح شدہ گائے کے گوشت کی درآمد پر پابندی کو سودے بازی کے لیے بطور ہتھیار استعمال کر سکتی ہے۔ان رپورٹس کے جواب میں البانیز نے کہا کہ ان کی حکومت حیاتیاتی تحفظ پر مذاکرات نہیں کرے گی لیکن ایسا حل تلاش کرنے کے لیے تیار ہے جو غذائی سلامتی پر سمجھوتہ نہ کرے۔انہوں نے اے بی سی ریڈیو کو بتایا کہ ہم کبھی بھی اپنے حیاتیاتی تحفظ کے قوانین میں نرمی نہیں کریں گے۔آسٹریلیا نے 2003 سے نافذ امریکی گائے کے گوشت کی درآمد پر عائد مکمل پابندی 2019 میں ختم کر دی تھی تاہم امریکا میں ذبح کئے جانے والے کینیڈین اور میکسیکن مویشیوں کے گوشت پر درآمدی پابندیاں اب بھی برقرار ہیں۔
