بیروت (لارڈ میڈیا): جنوبی لبنان میں اسرائیلی فضائی حملے کے نتیجے میں اسکول پرنسپل سمیت چار افراد جاں بحق ہوگئے ہیں۔ اسرائیلی فوج نے دعویٰ کیا ہے کہ انہوں نے جنوبی لبنان کے سرحدی گاؤں حداثہ پر کنٹرول حاصل کر لیا ہے اور اسے سیکیورٹی زون کا حصہ قرار دیا ہے۔
لبنان کی سرکاری نیشنل نیوز ایجنسی کے مطابق، نبطیہ الفوقہ میں ایک گاڑی پر حملے میں چار افراد جاں بحق ہوئے، جن میں ایک اسکول پرنسپل، ان کی والدہ، ایک غیر ملکی گھریلو ملازمہ اور ایک شامی شہری شامل ہیں۔
لبنان کے صدر جوزف عون نے اسرائیلی کارروائیوں پر شدید تشویش کا اظہار کرتے ہوئے کہا ہے کہ اسرائیلی قبضہ لبنانی فوج کی تعیناتی میں رکاوٹ ہے اور یہ لبنان کے مفادات کے خلاف ہے۔
لبنانی حکومت کا کہنا ہے کہ اسرائیلی حملے جنگ بندی معاہدے کی خلاف ورزی ہیں اور خطے میں کشیدگی میں اضافہ کر رہے ہیں۔ صدر جوزف عون نے اعلان کیا ہے کہ وہ جولائی کے اختتام سے قبل امریکا کا دورہ کریں گے اور وائٹ ہاؤس میں امریکی صدر سے ملاقات کریں گے۔
جوزف عون نے اپنے بیان میں کہا کہ یہ فریم ورک مثالی نہیں ہے لیکن لبنانی حکومت نے اسے زمینی حقائق کے مطابق قبول کیا ہے۔ لبنان اپنے حقوق سے دستبردار نہیں ہوگا اور اپنے مقبوضہ علاقوں کی واپسی کی کوششیں جاری رکھے گا۔
صدر عون نے مزید کہا کہ سیکیورٹی انتظامات کی مرحلہ وار منتقلی کا آغاز نبطیہ کے علاقے زوطر سے کیا جائے گا اور مخصوص قصبوں میں لبنانی فوج کو سیکیورٹی کی ذمہ داری دی جائے گی۔
