بوداپست (شِنہوا) چینی برانڈ میلہ 2026 (وسطی و مشرقی یورپ) کا افتتاح ہنگری کے دارالحکومت بوداپست میں ہوا، جہاں چینی اور علاقائی کمپنیوں نے نئے کاروباری مواقع تلاش کرنے اور چین اور وسطی و مشرقی یورپی (سی ای ای) ممالک کے درمیان اقتصادی تعاون کو مزید مضبوط بنانے کے لئے شرکت کی۔
افتتاحی تقریب سے خطاب کرتے ہوئے ہنگری کی وزارت معیشت و توانائی کی ریاستی سیکرٹری جودٹ زولنائے نے کہا کہ پائیدار اقتصادی تعاون کی بنیاد اعتماد، پیش گوئی کے قابل ماحول اور قابل بھروسہ شراکت داری پر قائم ہوتی ہے۔ انہوں نے عالمی سرمایہ کاروں کے لئے کھلا اور مستحکم کاروباری ماحول فراہم کرنے کے ہنگری کے عزم کا اعادہ کرتے ہوئے کہا کہ ہنگری مشرق اور مغرب کے درمیان رابطے اور ملاپ کا ایک اہم مرکز بن چکا ہے۔
زولنائے نے کہا کہ ہنگری اور چین کے اقتصادی تعلقات کے اگلے مرحلے میں گزشتہ کامیابیوں کو بنیاد بناتے ہوئے زیادہ قدر افزا تعاون، ادارہ جاتی روابط کے فروغ اور باہمی فوائد میں اضافے پر توجہ مرکوز کی جانی چاہیے۔
ہنگری کے دارالحکومت بوداپست میں منعقدہ چینی برانڈ میلہ 2026 (وسطی و مشرقی یورپ) میں ایک لڑکی انسان نما روبوٹ کے ساتھ بات کر رہی ہے۔(شِنہوا)
ہنگری میں تعینات چینی سفیر گونگ تاؤ نے کہا کہ ہنگری میں سرمایہ کاری کرنے والی چینی کمپنیاں نہ صرف ملک کی صنعتی ترقی اور ٹیکنالوجی میں جدت میں کردار ادا کر رہی ہیں بلکہ اپنی ترقی کو بھی آگے بڑھا رہی ہیں۔
گونگ نے کہا کہ ہم امید کرتے ہیں کہ کاروباری حضرات اس نمائش کو کاروباری مواقع تلاش کرنے، باہمی اعتماد کو مضبوط بنانے اور چین اور وسطی و مشرقی یورپ کے درمیان تعاون کے ایک نئے باب میں حصہ ڈالنے کے لئے استعمال کریں گے۔
چین کی وزارت تجارت کے ماتحت غیرملکی تجارت کی ترقی کے ادارے کے نائب ڈائریکٹر وانگ دے یانگ نے بتایا کہ 2025 میں چین اور ہنگری کے درمیان دوطرفہ تجارت میں گزشتہ سال کے مقابلے میں 28.3 فیصد اضافہ ہوا ہے۔
انہوں نے کہا کہ یہ تین روزہ نمائش 10ہزار مربع میٹر کے رقبے پر مشتمل ہے، جس میں زراعت اور جنگلات کی مشینری، توانائی ذخیرہ کرنے کے آلات، الیکٹرانکس اور تعمیراتی مواد سمیت مختلف شعبوں میں جدید مصنوعات اور ٹیکنالوجیز پیش کی جا رہی ہیں۔
ہنگری کے دارالحکومت بوداپست میں منعقدہ چینی برانڈ میلہ 2026 (وسطی و مشرقی یورپ) میں شہری شریک ہیں۔(شِنہوا)
اس سال کی نمائش میں خاص طور پر ہنگری کی برآمدات کو چین تک فروغ دینے پر زور دیا گیا ہے۔ ہنگری اور دیگر وسطی و مشرقی یورپی ممالک کی کمپنیوں کو وسیع چینی منڈی تک آسان رسائی دینے کے لئے خصوصی کاروباری ملاقاتوں کا اہتمام کیا گیا ہے۔
توقع ہے کہ وسطی و مشرقی یورپی ممالک سے 7ہزار سے زائد پیشہ ور خریدار اس میلے میں شرکت کریں گے۔
