ہائیکو (شِنہوا) ہائی نان کی یانگ پو بندرگاہ کو بھارت سے جوڑنے والا ایک نیا کنٹینر شپنگ روٹ باقاعدہ فعال ہو گیا ہے جس سے اس گہرے پانی کی بندرگاہ کے لئے دوسری جنوبی ایشیائی سروس کا اضافہ ہو گیا۔
یانگ پو میری ٹائم بیورو کے مطابق یانگ پو بندرگاہ ہائی نان فری ٹریڈ پورٹ (ہائی نان ایف ٹی پی) کی سب سے بڑی کارگو بندرگاہ ہے۔ یہ روٹ یانگ پو کو ویتنام کے شہر ہائی فونگ، سنگاپور اور بھارت کے شہر مندرا سے جوڑتا ہے جس سے چین کے جنوبی علاقے، بیبو خلیج اور جنوبی ایشیا کی اہم بندرگاہیں آپس میں منسلک ہو جاتی ہیں۔
بیورو کا کہنا ہے کہ نئے یانگ پو-انڈیا بحری روٹ سے ہائی نان کی مصنوعات جس میں رائی کا تیل اور کیمیائی سامان شامل ہے، بھارتی مارکیٹ تک پہنچانے کے لئے ایک تیز تر برآمدی راستہ فراہم ہونے کی توقع ہے۔ چین کی دیگر بندرگاہوں سے آنے والا سامان بھی یانگ پو کے ذریعے جنوبی ایشیا میں منتقل کیا جا سکتا ہے۔
یہ روٹ نئی بین الاقوامی زمینی و بحری تجارتی راہداری میں مرکز کے طور پر یانگ پو کے کردار میں مزید اضافہ کرتا ہے جو چین کے مغربی خطوں کو عالمی منڈیوں سے جوڑنے والا ایک اہم لاجسٹکس نیٹ ورک ہے۔
چین کے صوبے ہائی نان کی یانگ پو بندرگاہ اور بھارت کو ملانے والے نئے کنٹینر شپنگ روٹ نے باضابطہ طور پر آپریشن شروع کر دیا۔(شِنہوا)
نئی روٹ کے ہموار آپریشن کو یقینی بنانے کے لئے یانگ پو میری ٹائم بیورو نے کہا کہ اس نے جہاز رانی کی کمپنیوں کے ساتھ جہازوں کی آمد و رفت کی ضروریات کے حوالے سے رابطہ و ہم آہنگی کی، ٹریفک انتظام کے منصوبوں میں ایڈجسٹمنٹ کی اور آبی گزرگاہوں اور بندرگاہی علاقوں میں گشت کو مضبوط بنایا۔
یانگ پو بندرگاہ نے 24 اکتوبر 2019 کو اپنا پہلا جنوبی ایشیائی جہاز رانی روٹ کھولا تھا جو یانگ پو کو ملائیشیا کی پورٹ کلانگ اور بنگلہ دیش کے شہر چٹاگانگ سے جوڑتا ہے۔
