کولکتہ (لارڈ میڈیا): بھارتی شہر کولکتہ کے علاقے لیک ٹاؤن میں نصب فٹبال لیجنڈ لیونل میسی کا 70 فٹ بلند مجسمہ حفاظتی خدشات کے باعث ہٹا دیا گیا ہے۔ مقامی رہائشیوں نے شکایت کی تھی کہ تیز ہواؤں کے دوران یہ مجسمہ ہلتا محسوس ہوتا تھا، جس سے خطرات پیدا ہو رہے تھے۔
میسی کا یہ مجسمہ دسمبر 2022 میں نصب کیا گیا تھا تاکہ 2022 فیفا ورلڈ کپ کے فاتح کپتان کو خراجِ تحسین پیش کیا جا سکے۔ مجسمے میں ارجنٹائن کے سپر اسٹار کو ورلڈ کپ ٹرافی تھامے ہوئے دکھایا گیا تھا۔
یہ یادگار میسی کے مداحوں کی جانب سے ان کے بھارت کے دورے کے موقع پر وی آئی پی روڈ کے کنارے قائم کی گئی تھی۔ حالیہ دنوں میں مقامی افراد نے انتظامیہ کو آگاہ کیا کہ تیز ہوا چلنے پر مجسمہ معمولی طور پر جھولتا نظر آتا ہے، جس سے راہگیروں اور قریبی آبادی کے لیے خطرہ ہو سکتا ہے۔
حکام نے عوامی تحفظ کو مدنظر رکھتے ہوئے مجسمے کو عارضی طور پر ہٹانے کا فیصلہ کیا ہے، جبکہ مستقبل کے بارے میں کوئی باضابطہ اعلان نہیں کیا گیا۔
