وفاقی کابینہ نے سی سی ایل سی اور ای سی سی فیصلوں کی توثیق، وفاقی بلدیاتی انتخابات ملتوی، آف گرڈ پلانٹس کو گیس فروخت بارے صدارتی حکم نامے کے اجرا کی منظوری دیدی جبکہ وزیراعظم شہباز شریف نے کہا ہے کہ رواں مالی سال کی پہلی سہ ماہی میں جی ڈی پی میں اضافہ خوش آئند، ریاستی ملکیتی اداروں کی نجکاری حکومت کے معاشی اصلاحات کے ویژن کا حصہ ہے۔
جاری اعلامئے کے مطابق جمعہ کو وزیراعظم شہباز شریف کی زیر صدارت وفاقی کابینہ کا اجلاس ہوا جس میں وفاقی وزراء ودیگر متعلقہ حکام نے شرکت کی۔
وفاقی کابینہ نے سی سی ایل سی کے فیصلوں اور اسلام آباد کیپٹل ٹیریٹری لوکل گورنمنٹ ترمیمی آرڈیننس کے حوالے سے کارروائی کی توثیق کردی۔
اعلامئے کے مطابق وفاقی کابینہ نے کابینہ کمیٹی برائے قانون سازی کے 3اور 30 دسمبر کے اجلاس کے فیصلوں، اسلام آباد کیپٹل ٹیریٹری لوکل گورنمنٹ (ترمیمی)آرڈیننس 2025 سے متعلق کارروائی کی توثیق کی گئی۔
کابینہ نے اقتصادی رابطہ کمیٹی کے 26 اگست کے اجلاس کے فیصلوں اور آف گرڈ لیوی سے متعلق بجلی تقسیم کار کمپنیوں کے صارفین کو ریلیف دینے کے فیصلے کی بھی توثیق کی۔
اعلامئے کے مطابق کابینہ نے تھرڈ پارٹی کی جانب سے آف گرڈ (کیپٹو پاور پلانٹس) کو گیس فروخت بارے لیوی ایکٹ 2025ء میں ترمیم کے صدارتی حکم نامے کے اجرا کیلئے کارروائی کی منظوری دے دی۔
اعلامئے کے مطابق کابینہ اجلاس سے خطاب کرتے ہوئے وزیراعظم نے کابینہ ارکان کو نئے سال کی مبارکباد دی اور نیک خواہشات کا اظہار کیا۔
وزیراعظم نے پی آئی اے کے 75فیصد حصص کی نجکاری انتہائی کامیابی سے طے پانے پر اطمینان کا اظہار کرتے ہوئے کہا کہ حکومت میں آتے ہی عزم کیا تھا کہ خسارے کا شکار ریاستی اداروں کی نجکاری کی جائے گی، پی آئی اے کی نجکاری اس حوالے سے انتہائی اہم سنگ میل ہے، ریاستی ملکیتی اداروں کی نجکاری حکومت کے معاشی اصلاحات کے ویژن کا حصہ ہے۔
انہوں نے کہا کہ رواں مالی سال کی پہلی سہ ماہی میں ملک کے جی ڈی پی میں خاطرخواہ اضافہ خوش آئند ہے، ہم ملک کو ڈیفالٹ کے دہانے سے نکال کر معاشی استحکام تک لائے ہیں۔
وزیراعظم نے حالیہ دورے کے دوران صدر یو اے ای سے ملاقات کو دو طرفہ تعلقات اور باہمی مشاورت کے تناظر میں انتہائی مفید قرار دیا، وزیراعظم نے بتایا کہ ایک روز قبل سعودی ولی عہد محمد بن سلمان سے ٹیلیفون پر خوشگوار بات چیت ہوئی جس میں دونوں ممالک کے درمیان معاشی اور سٹرٹجک تعلقات کی رفتار پر اطمینان کا اظہار کیا گیا۔
