لاہور: وفاقی وزیراطلاعات عطا اللہ تارڑ نے کہا ہے کہ صحافت کی آڑ میں سوشل میڈیا کو مادر پدر آزاد نہیں چھوڑا جا سکتا، پیکا ایکٹ کا مقصد فیک نیوز کا خاتمہ ،سوشل میڈیا خطرات کا تدارک کرنا ہے۔لاہور میں تقریب حلف برداری سے خطاب میں وزیراطلاعات عطا اللہ تارڑ نے کہا کہ پیکا ایکٹ میں دنیا کے بہترین طریقوں کو اپنایا گیا ہے، سوشل میڈیا کے خطرات روکنے کیلئے یہ اچھا اقدام ہے۔
انہوں نے کہا کہ پیکا ایکٹ کا مقصد فیک نیوز کا خاتمہ اور سوشل میڈیا کے خطرات کا تدارک کرنا ہے،صحافت کی آڑ میں سوشل میڈیا کو مادر پدر آزاد نہیں چھوڑا جا سکتا، ایکٹ میں کوئی متنازع شق ہے تو سامنے لائی جائے ہم اس پر بات کرنے کیلئے تیار ہیں۔
انہوں نے بتایا کہ جلد ڈیجیٹل میڈیا پروٹیکشن اتھارٹی میں نجی شعبے سے نامزدگیاں کی جائیں گی، پریس کلب یا صحافتی تنظیموں سے منسلک صحافیوں کو اس میں شامل کیا جائے گا۔ انہوں نے کہا کہ اداروں کے ملازمین قومی اثاثہ ہیں، ملازمین کی محنت، لگن اور مہارتیں ہی ادارے کی کامیابی کی بنیاد ہوتی ہیں،کرپشن نے اداروں کو ناقابل تلافی نقصان پہنچایا ہے۔
انہوں نے کہا کہ حکومت اداروں کی بہتری اور انہیں منافع بخش بنانے کیلئے تمام وسائل بروئے کار لا رہی ہے،وزارت اطلاعات کے ماتحت اداروں کو بھی منافع بخش بنانے کیلئے تمام وسائل بروئے کار لارہے ہیں۔
انہوں نے کہا کہ صحافیوں کو درپیش مسائل کا حل اولین ترجیح ہے،پی ٹی وی، ریڈیو پاکستان اور اے پی پی قومی ادارے ہیں جو عوام کو معلومات کی فراہمی کی بنیادی ذمہ داریوں کے ساتھ ساتھ ملکی نظریاتی سرحدوں کے محافظ بھی ہیں۔ انہوں نے کہا کہ موجودہ دور جدید ٹیکنالوجی کا دور ہے ہمیں دنیا کا مقابلہ کرنے کے لئے جدید ٹیکنالوجی کو اپنانا ہوگا۔
