اسلام آباد: وزیر داخلہ محسن نقوی نے امریکی سرمایہ کاروںکو پاکستان میں کان کنی اور آئی ٹی سیکٹر میں سرمایہ کاری کی دعوت دیتے ہوئے کہا کہ پاکستان معاشی استحکام کی جانب گامزن ،معاشی اشاریئے بہتر ،معیشت ٹیک آف کر رہی ہے،یو ایس پاکستان بزنس کونسل پاکستان میں موجود سرمایہ کاری مواقعوں سے فائدہ اٹھا سکتی ہے، سہولیات فراہم، مسائل حل کئے جائیں گے۔
واشنگٹن میں وفاقی وزیرداخلہ محسن نقوی نے یو ایس چیمبر آف کامرس میں امریکہ پاکستان بزنس کونسل کے اعلی سطحی وفد سے ملاقات کی۔
وفد میں سینئر نائب صدر چارلس فریمین، ایگزیکٹو ڈائریکٹر و صدر امریکہ پاکستان بزنس کونسل ایسپیرنزا جیلالین، ایگزیکٹو ڈائریکٹر سنٹر فار گلوبل ریگولیٹری کارپوریشن ایبل ٹواریس، منیجر امریکہ پاکستان بزنس کونسل منیشا ویپا شامل تھے ، اس موقع پر امریکہ میں پاکستانی سفیر رضوان سعید شیخ، ٹریڈ اتاشی اور دیگر حکام بھی موجود تھے۔
ملاقات میں مائنگ اور انفارمیشن ٹیکنالوجی کے شعبوں میں سرمایہ کاری و تعاون بڑھانے پر تفصیلی بات چیت کی گئی۔وزیر داخلہ نے امریکی سرمایہ کاروں کو کان کنی اور آئی ٹی سیکٹر میں سرمایہ کاری کی دعوت دیتے ہوئے کہا کہ یو ایس پاکستان بزنس کونسل پاکستان میں موجود سرمایہ کاری کے بے پناہ مواقعوں سے فائدہ اٹھا سکتی ہے۔
انہوں نے کہا کہ پاکستان معاشی استحکام کی جانب گامزن ہے، تمام معاشی اشاریئے بہتر ہوئے ہیں،معیشت ٹیک آف کر رہی ہے ۔ انہوں نے کہا کہ پاکستان سرمایہ کاری کیلئے پر کشش مواقع رکھتا ہے، ضروری این او سیز کا اجرا میں بہتری لائی گئی ہے۔
وزیر داخلہ نے کہا کہ پاکستان میں کام کرنیوالی امریکی کمپنیوں کے مسائل سنے ہیں جو ترجیحی بنیادوں پر حل کئے جائیں گے۔ انہوں نے امریکہ پاکستان بزنس کونسل کو ترجیحی بنیادوں پر خصوصی سہولیات فراہم کرنے کی یقین دہانی کرائی۔
