بیجنگ (شِنہوا) چین میں غذائی تحفظ سے متعلق جرائم کے خلاف نئی رہنما ہدایات کے مطابق کارروائیاں تیز کی جا رہی ہیں جبکہ خوراک کی آن لائن فروخت اور کاروبار کے دیگر نئے طریقوں کی نگرانی بھی سخت کی جا رہی ہے۔
کمیونسٹ پارٹی آف چائنہ کی مرکزی کمیٹی کے سیاسی و قانونی امور کے کمیشن کی جانب سے جاری کردہ رہنما ہدایات میں سنگین جرائم پر سخت سزائیں دینے اور خوراک کے تحفظ کے نگران اداروں اور فوجداری نظام انصاف کے حکام کے درمیان تعاون بڑھانے پر زور دیا گیا ہے۔
کمیشن کے ایک نمائندے نے پیر کے روز کہا کہ چین میں خوراک کے تحفظ کی مجموعی صورت حال مستحکم ہے، تاہم اس شعبے سے متعلق جرائم کے طریقے زیادہ پیچیدہ ہونے، آن لائن پلیٹ فارمز کے بڑھتے ہوئے استعمال اور سپلائی چین کے مختلف مراحل تک پھیلنے کے باعث حکام کو نئے چیلنجز کا سامنا ہے۔
ہدایت نامے میں گوشت کی مصنوعات، سکولوں میں فراہم کئے جانے والے کھانے، صحت بخش غذائی مصنوعات، سبزیوں اور پھلوں کو نگرانی اور کارروائی کے لئے اہم ترجیحات قرار دیا گیا ہے۔ اس کے علاوہ خوراک کی پیداوار، آن لائن فروخت، کھانے پینے کی خدمات اور درآمدات کی جانچ پڑتال سخت کرنے پر بھی زور دیا گیا ہے۔
چین تازہ خوراک کی آن لائن تجارت، کھانے کی ہوم ڈیلیوری اور لائیو سٹریم کے ذریعے فروخت میں شامل کاروباری اداروں کی نگرانی سے متعلق ذمہ داریاں واضح کرنے کے لئے خوراک کے تحفظ کے قانون میں ترامیم کے عمل کو بھی تیز کرنے کا ارادہ رکھتا ہے۔
ہدایت نامے میں یہ بھی کہا گیا ہے کہ تحقیقات کے دوران نئے غیر قانونی مادوں کی نشاندہی ہونے پر ممنوعہ غذائی اضافوں کی فہرستوں کو اپ ڈیٹ کیا جائے۔
