تہران (لارڈ میڈیا): ایرانی وزیر خارجہ عباس عراقچی نے امریکا کی جانب سے ایران کے خلاف معاشی دباؤ کو اقتصادی دہشت گردی قرار دیا ہے۔ انہوں نے کہا ہے کہ امریکی پابندیاں نہ صرف ایران بلکہ عالمی معیشت اور خودمختاری کے لئے خطرہ ہیں۔
عباس عراقچی نے امریکی صدر ڈونلڈ ٹرمپ کے بیانات پر ردعمل دیتے ہوئے کہا کہ واشنگٹن اپنی داخلی مشکلات سے توجہ ہٹانے کے لئے ایران کے خلاف جارحانہ اقدامات کر رہا ہے۔ انہوں نے نیویارک ٹائمز کی رپورٹ کا حوالہ دیتے ہوئے کہا کہ امریکا کا قومی قرضہ 40 ٹریلین ڈالر تک پہنچ چکا ہے۔
ایرانی وزیر خارجہ نے سوشل میڈیا پر مزید کہا کہ امریکا کی ناکام پالیسیاں مزید ناکامیوں کو جنم دیں گی۔ انہوں نے امریکی اقتصادی حکمت عملی کو ایران کے خلاف معاشی اعلانِ جنگ کا تسلسل قرار دیا۔
یہ بیان ایک ایسے وقت میں آیا ہے جب صدر ٹرمپ نے ایران کے خلاف غیر معمولی معاشی جنگ کا اعلان کیا ہے، جس میں ایران کے ساتھ تعاون کرنے والے ممالک کو بھی نتائج بھگتنے کی دھمکی دی گئی ہے۔
تہران کا کہنا ہے کہ ایسی پابندیاں بین الاقوامی تجارت اور سپلائی چینز پر منفی اثرات ڈال سکتی ہیں جبکہ مبصرین اسے ایران کو عالمی مالیاتی نظام سے مزید تنہا کرنے کی کوشش سمجھتے ہیں۔
