غزہ (شِنہوا) حماس نے اعلان کیا ہے کہ اس نے مصر کے دارالحکومت قاہرہ میں فلسطینی دھڑوں اور ثالثوں کے ساتھ جنگ بندی معاہدے پر عملدرآمد اور غزہ کی پٹی کے مستقبل پر بات چیت کے لئے اجلاسوں کا آغاز کر دیا ہے۔
حماس کے ترجمان حازم قاسم نے صحافیوں کو بتایا کہ ان ملاقاتوں کا مقصد پہلے مرحلے میں طے پانے والے امور کو مکمل کرنا ہے، جن میں اسرائیلی جارحیت، کشیدگی، ٹارگٹ کلنگ کا خاتمہ، سرحدی گزرگاہوں کا کھلنا اور قومی کمیٹی کے داخلے کی اجازت شامل ہیں۔
انہوں نے کہا کہ اس کے بعد بات چیت دوسرے مرحلے کے حوالے سے تمام فریقوں کے لئے قابل قبول اور معقول طریقہ کار تلاش کرنے پر مرکوز ہوگی، خواہ اس میں بین الاقوامی فورسز یا غزہ کی ٹیکنوکریٹ کمیٹی کا علاقے میں داخلہ شامل ہو یا فلسطینی ہتھیاروں کے مسئلے پر غور کرنا ہو۔
قاسم کے مطابق حماس فلسطینی عوام کے مفاد کو ترجیح دیتی ہے اور اسرائیل کو غزہ کی پٹی کے خلاف جنگ دوبارہ شروع کرنے کے لئے کسی بھی بہانے سے محروم کرنا چاہتی ہے۔
غزہ میں حماس کے سربراہ خلیل الحیا کی قیادت میں حماس کا ایک وفد دیگر فلسطینی دھڑوں کے نمائندوں کے ہمراہ جمعہ کے روز کئی روز تک جاری رہنے والے مذاکرات میں شرکت کے لئے قاہرہ پہنچا۔
یہ پیشرفت ایسے وقت میں سامنے آئی ہے جب اکتوبر 2025 میں حماس اور اسرائیل کے درمیان ہونے والی جنگ بندی کمزور پڑتی دکھائی دے رہی ہے جبکہ غیر مسلح کرنے اور تعمیر نو سمیت کئی اہم شقوں پر ابھی تک عملدرآمد نہیں ہو سکا۔
جنگ بندی کے پہلے مرحلے میں قیدیوں اور زیر حراست افراد کا تبادلہ، غزہ میں انسانی امداد کی فراہمی اور بعض علاقوں سے اسرائیلی افواج کا انخلا شامل تھا۔
امریکہ نے جنوری کے وسط میں جنگ بندی کے دوسرے مرحلے کے آغاز کا اعلان کیا تھا، جس میں اسرائیلی فوج کا مکمل انخلا، حماس کا غیر مسلح ہونا، غزہ کی تعمیر نو اور وہاں ایک عبوری انتظامی حکومت کے قیام کے اقدامات شامل ہیں۔
