وینتیان (شِنہوا) چین-لاؤس ریلوے کے حوالے سے قصہ گوئی کی ایک تقریب لاؤس کے دارالحکومت وینتیان میں منعقد ہوئی۔
"گولڈن ریلوے کی تعمیر، دونوں ممالک کے عوام کے لئے فائدہ مند” کے عنوان سے منعقدہ اس تقریب میں 60 سے زائد شرکاء نے حصہ لیا جن میں چین اور لاؤس کی سرکاری ایجنسیوں کے حکام، کاروباری نمائندگان، صحافی، ماہرین تعلیم اور ریلوے کے ملازمین شامل تھے۔ شرکاء نے اپنے ذاتی تجربات بیان کئے جن سے ریلوے کے انقلابی اثرات کو اجاگر کیا گیا۔
یہ تقریب چین اور لاؤس کے درمیان سفارتی تعلقات کے 65 سال مکمل ہونے اور چین-لاؤس دوستی کے سال کی تقریبات کے سلسلے کا حصہ تھی۔
اپنے خطاب میں لاؤس میں چین کی سفیر فانگ ہونگ نے چین-لاؤس ریلوے کو بیلٹ اینڈ روڈ انیشی ایٹو کے تحت ایک نمایاں منصوبہ قرار دیتے ہوئے کہا کہ اس ریلوے نے دونوں ممالک کے عوام کو حقیقی فوائد پہنچائے ہیں اور اس کے آغاز کے بعد سے 4 سال کے عرصے میں روٹ کے ساتھ واقع برادریوں کی زندگیوں میں نمایاں تبدیلی آئی ہے۔
لاؤس کے ایک عہدیدار نے ریلوے کے سماجی و اقتصادی اثرات پر زور دیتے ہوئے کہا کہ اس سے روزگار کے مواقع پیدا ہوئے، سفر میں آسانی ہوئی، تجارت اور مال برداری میں اضافہ ہوا اور بین الاقوامی سیاحوں کو بھی راغب کیا گیا۔
