رومانیہ کے دارالحکومت بخارسٹ میں قائم چینی ثقافتی مرکز کو سال 2026 کے بہار کے تہوار کی تقریب کے موقع پر خوبصورتی سے سجایا گیا۔ اس موقع پر "گھوڑے کا سال، دوستی کے لئے فن” کے عنوان سے نوجوانوں کے درمیان فن پاروں کے مقابلے کی انعامی تقریب بھی منعقد کی گئی۔
ان مشترکہ تقریبات میں تقریباً 200 افراد نے شرکت کی جن میں رومانیہ کے طلبہ، بچے، چینی ثقافت سے دلچسپی رکھنے والے مقامی افراد اور بیرونِ ملک مقیم چینی کمیونٹی کے ارکان شامل تھے۔
بخارسٹ چینی ثقافتی مرکز میں تائی چی، خطاطی اور گُوژینگ کی کلاسوں کے طلبہ نے پرفارمنسز اور عملی مظاہرے پیش کئے جنہیں حاضرین نے بھرپور تالیاں بجا کر سراہا۔
مہمانوں نے عملی نوعیت کی مختلف ثقافتی سرگرمیوں میں بھی حصہ لیا۔ ان سرگرمیوں میں واٹر ماربلنگ لاکر آرٹ سے لکڑی کے پنکھے تیار کرنا، شاہی لالٹین بنانا، گھوڑے کی شکل کے ماڈل بنانے کے بلاکس جوڑنا، ہان فو لباس پہن کر دیکھنا اور روایتی چینی چائے کے ساتھ تہوار کی خصوصی غذائیں مثلاً فرائیڈ رائس کیکس اور میٹھے آلوؤں کی مٹھائی چکھنا شامل تھا۔
ساؤنڈ بائٹ 1(انگریزی): کرسٹینا بُوکوران، انعام جیتنے والی مہمان
"میرے لئے گھوڑا رفتار کی علامت ہے لیکن یہ اس جذبے کی بھی نمائندگی کرتا ہے کہ آپ کامیابی حاصل کریں، قبولیت پائیں اور خود کو پہلے سے بہتر بنائیں۔ میں بھی اس وقت یہی چاہتی ہوں کہ تعلیم میں یا جو بھی کام کر رہی ہوں، اس میں خود کو مزید بہتر بناؤں۔
میں آئندہ بھی اس طرح کے مزید تجربات حاصل کرنا چاہوں گی۔ مقابلوں میں حصہ لینا اور کامیابی حاصل کرنا میرے لئے بہت خوشی کی بات ہے کیونکہ یہ مقابلہ واقعی شاندار تھا۔
میں چین کے مزید علاقوں اور اس کی ثقافت کو قریب سے جاننا چاہتی ہوں کیونکہ یہ مجھے بے حد دلچسپ لگتی ہے۔ میں اس کے بارے میں اور بھی زیادہ سیکھنے کی خواہش رکھتی ہوں۔”
ساؤنڈ بائٹ 2 (انگریزی): ایلیانا لازاریسکو، تقریب میں شریک مہمان
"یہ ایک چھوٹا سا لکڑی کا پنکھا ہے۔ مجھے اسے رنگوں میں ڈبونا ہوتا ہے اور جب میں اسے اوپر اٹھاتی ہوں تو دیکھئے اس پر خوبصورت نقش و نگار بن جاتے ہیں۔ یہ تجربہ واقعی بہت مزے دار اور دلچسپ تھا۔”
ساؤنڈ بائٹ 3 (انگریزی): آریانا کرسٹیا، تقریب میں شریک مہمان
"مجھے بہت سی چیزیں پسند آئیں خاص طور پر تائی چی۔ میرے خیال میں یہ ایک نہایت خوبصورت مارشل آرٹ ہے۔ یہ واقعی بہت دلکش ہے اور مجھے بے حد پسند آئی۔ میں اسے مزید دیکھنا چاہوں گی کیونکہ یہ بہت خوبصورت ہے اور میں نے اس سے بھرپور لطف اٹھایا۔”
ساؤنڈ بائٹ 4 (انگریزی): واسیلے سرگے بابینیٹی، تقریب میں شریک مہمان
"میں نیچے منعقد ہونے والی چائے کی تقریب میں شریک ہوا اور مجھے یہ بہت دلچسپ لگی۔ یہ چینی عوام کی ایک نہایت قدیم روایت ہے جس میں گہرے اور تاریخی معانی پوشیدہ ہیں۔
گھوڑے کا سال سب سے بڑھ کر توانائی، رفتار اور جوش و خروش کی علامت ہے۔ اس لئے میں امید کرتا ہوں کہ پندرہویں پانچ سالہ منصوبے کے پہلے سال میں یہ ایک اچھا آغاز ثابت ہوگا۔ میں دلی طور پر چینی عوام کے لئے یہی امید اور نیک تمنائیں رکھتا ہوں۔”
مسلسل تیسرے سال منعقد ہونے والی اس تقریب کا انعقاد بخارسٹ میں چینی ثقافتی مرکز اور رومانیہ کی ثقافت و فن کے فروغ کی تنظیم نے مشترکہ طور پر کیا۔ بہار کے تہوار کے موقع پر یہ تقریب بدستور ثقافتی تبادلوں کے ایک مؤثر پلیٹ فارم کے طور پر خدمات انجام دے رہی ہے۔
تقریب کی میزبانی بخارسٹ میں قائم چینی ثقافتی مرکز اور چائنہ سینٹر فار انٹرنیشنل کلچرل ایکسچینج اینڈ ٹورازم پروموشن نے رومانیہ میں چینی سفارت خانے کی معاونت سے کی۔
بخارسٹ سےشِنہوا نیوز ایجنسی کے نمائندوں کی رپورٹ
۔۔۔۔۔۔۔۔۔۔۔۔۔۔
ٹیکسٹ آن سکرین:
بخارسٹ کے چینی ثقافتی مرکز میں بہار کے تہوار کا رنگا رنگ جشن
"ایئر آف دی ہارس: آرٹ فار فرینڈشپ” مقابلے کی انعامی تقریب بھی منعقد
تقریباً دو سو طلبہ، بچے اور ثقافت سے دلچسپی رکھنے والے افراد شریک ہوئے
تائی چی، خطاطی اور گُوژینگ کی دلکش پرفارمنسز نے حاضرین کو متاثر کیا
مہمانوں نے لکڑی کے پنکھوں پر واٹر ماربلنگ لاکر آرٹ تیار کیا
شرکاء نے شاہی لالٹین بنائیں اور گھوڑے کی شکل کے ماڈلز جوڑے
روایتی ہان فو لباس پہن کر دیکھنے کا منفرد تجربہ پیش کیا گیا
چینی چائے کی تقریب اور تہوار کی خصوصی مٹھائیاں توجہ کا مرکز رہیں
شرکاء نے گھوڑے کے سال کو رفتار، توانائی اور کامیابی کی علامت قرار دیا
تقریب رومانیہ اور چین کے درمیان ثقافتی تبادلے کا مؤثر پلیٹ فارم ثابت ہوئی
