اسلام آباد: وزیراعظم شہباز شریف نے نوجوانوںکو تبدیلی کا محرک ،خوشحال مستقبل کی ضمانت قرار دے کر پالیسی سازی میں شامل کرنے کی ضرورت پر زور دیاہے۔منگل کو کامن ویلتھ ایشیا یوتھ الائنس کانفرنس سے خطاب کرتے ہوئے وزیراعظم شہباز شریف نے کہا کہ قومی ترقی و پالیسی سازی میں نوجوانوں کا کردار بڑھانے کی اشد ضرورت ہے، تعلیم کو فروغ دے کر نوجوانوں کو بااختیار بنایا جا سکتا ہے، کیونکہ نوجوان ہی پرامن اور خوشحال مستقبل کی ضمانت ہیں۔
انہوں نے کہا کہ دولت مشترکہ رکن ممالک کے درمیان شرکت داری کیلئے یہ ایک بہترین پلیٹ فارم ہے۔ انہوں نے پرائم منسٹر یوتھ پروگرام کو نوجوانوں کی ترقی و بہبود کا فلیگ شپ پروگرام قرار دیتے ہوئے کہا کہ پاکستان دولت مشترکہ کا بانی رکن ہے، جو اس پلیٹ فارم کو شراکت داری اور اتفاق رائے کا اہم ذریعہ سمجھتا ہے۔
انہوں نے کہا کہ دولت مشترکہ کی 60فیصد آبادی 30سال سے کم عمر کے افراد پر مشتمل ہے، جنہیں جدید ٹیکنالوجی اور فنی تعلیم سے آراستہ کرنے کی ضرورت ہے۔انہوںنے کہا کہ پاکستان کی 70فیصد آبادی بھی 30سال سے کم عمر کے افراد پر مشتمل ہے، جو ملک کی ترقی میں کلیدی کردار ادا کر سکتی ہے۔
انہوں نے کہا کہ نوجوان آج کے دور میں تبدیلی کے محرک ہیں اور قومی تعمیر کی کوششوں میں ان کی شرکت یقینی بنانی ہوگی، پرائم منسٹر یوتھ پروگرام کے تحت 6 لاکھ مستحق طلبہ کو لیپ ٹاپ فراہم کئے جو کورونا کے دوران تعلیم کا ذریعہ بنے۔
انہوں نے کہا کہ دانش سکولز کی مدد سے کم وسائل رکھنے والے طلبہ کو معیاری تعلیم کی فراہمی جاری ہے جس کا دائرہ کار آزاد کشمیر، گلگت بلتستان اوربلوچستان سمیت ملک کے دور دراز علاقوں تک بڑھایا جا رہا ہے،اسی طرح پنجاب ایجوکیشن انڈومنٹ فنڈ کے ذریعے کم مالی وسائل کے حامل طلبہ کو وظائف فراہم کئے گئے ہیں۔
انہوںنے کامن ویلتھ ایشیا یوتھ الائنس سیکرٹریٹ کے قیام کو خوش آئند قرار دیتے ہوئے کہا کہ یہ نوجوان قیادت کے کردار کو مضبوط بنانے کا موثر پلیٹ فارم ہے، جو نوجوان نسل کے مابین مکالمے کے فروغ میں معاون ہوگا۔
