پشاور: مشیر اطلاعات خیبر پختونخوا بیرسٹر سیف نے کہا ہے کہ کرم امن معاہدے کے بعد لشکر کشی کرنیوالے کیخلاف دہشت گرد سمجھ کر کارروائی کی جائے گی۔جاری بیان میں بیرسٹر سیف نے کہا کہ (آج) ہفتے کے روز جانے والے قافلے کے سفری و حفاظتی انتظامات کئے جا رہے ہیں،ایپکس کمیٹی فیصلے کی روشنی میں علاقے کو اسلحے اور بنکرز سے پاک کیا جائے گا۔
انہوں نے کہا کہ معاہدے کے مطابق اسلحہ جمع کرنے کیلئے دونوں فریق 15دنوں میں مربوط لائحہ عمل دیں گے، اسلحہ کے آزادانہ نمائش و استعمال پر پابندی ہوگی اور اسلحہ خریدنے کیلئے چندہ جمع کرنے کی اجازت نہیں ہوگی۔
انہوں نے کہا کہ معاہدے کے مطابق فریقین کے ہر قسم کے بنکرز کی تعمیر پر پابندی ہوگی جبکہ علاقے میں پہلے سے موجود بنکرز ایک مہینے کے اندر اندر ختم کئے جائیں گے۔انہوں نے واضح کیا کہ بنکرز کی مسماری کے بعد جو بھی فریق لشکر کشی کرے گا، ان کو دہشت گرد سمجھ کر کارروائی کی جائے گی۔
