راولپنڈی: چیف آف آرمی سٹاف جنرل سید عاصم منیر نے مسیحی برادری کو قوم کیلئے فخراورطاقت کا باعث قرار دیتے ہوئے کہا ہے کہ کرسمس ہمدردی، سخاوت، خیرسگالی کے آفاقی اصولوں کی یاد دلاتی ہے، قائداعظم کے آزادی، مساوات ،مذہبی رواداری کے اصول قوم کو درپیش چیلنجز کے حل کیلئے رہنمائی فراہم کرتے ہیں،پاکستان کو ایک پرامن اور خوشحال ملک بنانے کیلئے ہم سب کو مل کر کام کرنا ہوگا۔
آئی ایس پی آر کے مطابق چیف آف آرمی سٹاف جنرل سید عاصم منیر نے کرسمس کے موقع پر راولپنڈی کے سینٹ جوزف کیتھولک کیتھیڈرل چرچ کا دورہ کیا اور مسیحی برادری کے ساتھ کرسمس کی خوشیاں منائیں۔مسیحی برادری نے آرمی چیف کا پرتپاک استقبال کیا اور شرکت پر اظہار تشکر کیا۔ترجمان کے مطابق جنرل عاصم منیر نے مسیحی برادری کو کرسمس کی دلی مبارکباد دیتے ہوئے کہا کہ کرسمس ہمیں ہمدردی، سخاوت اور خیرسگالی کے آفاقی اصولوں کی یاد دلاتی ہے، جو ہماری متنوع قوم کو جوڑنے والی بنیاد ہیں۔
آرمی چیف نے مسیحی برادری اور اقلیتوں کی پاکستان کی ثقافتی، سماجی، معاشی اور قومی ترقی میں نمایاں خدمات کو سراہتے ہوئے کہا کہ مسیحی برادری ہمارے لئے قومی فخر اور قوت کا باعث ہے ۔آرمی چیف نے نے قائداعظم محمد علی جناح کو خراج عقیدت پیش کرتے ہوئے کہا کہ قائد اعظم کی بصیرت افروز قیادت، پختہ عزم اور اایمان، اتحاد اور تنظیم کے اصولوں پر سختی سے کاربند رہنے کی وجہ سے پاکستان کا قیام ممکن ہوا۔
انہوں نے کہا کہ قائداعظم کے آزادی، مساوات اور مذہبی رواداری کے اصول آج بھی قوم کو درپیش چیلنجز کے حل کیلئے رہنمائی فراہم کرتے ہیں۔آرمی چیف نے کہا کہ آج کے دن ہم یہ عہد کریں کہ قائداعظم کے خواب کو حقیقت میں بدلنے کے لیے اپنی بھرپور کوششیں جاری رکھیں گے۔ انہوں نے کہا کہ پاکستان کو ایک پرامن اور خوشحال ملک بنانے کے لیے ہم سب کو مل کر کام کرنا ہوگا۔
