آرمی چیف ترقی کے تسلسل کو برقرار رکھیں گے، نگراں وزیراعظم

نگراں وزیراعظم انوار الحق کاکڑ کا کہنا ہے کہ آرمی چیف جنرل عاصم منیر ملکی ترقی کے تسلسل کو برقرار رکھیں گے۔ انکا کہنا تھا کہ موجود نگران حکومت دن رات محنت کر رہی ہے جس کی بدولت آئندہ چند ہفتوں میں پاکستان میں سرمایہ کاری سے متعلق اچھی خبریں ملیں گی۔ وزیراعظم نے کہا کہ نگران حکومت کے اختتام کے بعد موجودہ منصوبوں کو جاری رکھنے کی ذمہ داری آرمی چیف نبھائیں گے۔ ایک تقریب سے خطاب میں انوار الحق کاکڑ نے کہا کہ ہم پاکستان انٹرنیشنل ائیر لائنز (پی آئی اے) کی نجکاری پر فوکس کیے ہوئے ہیں، یہ ہماری پہلی ترجیح ہے۔ انہوں نے کہا کہ اگلے 10 سال میں 10 لاکھ نرسز کو تربیت دینے کا پروگرام ہے، گزشتہ 5 سے 6 دہائیوں میں لوگ یورپ گئے اور وہیں سیٹل ہوگئے، البتہ انسانی وسائل کی ترقی کے لئے بھی کام جاری ہے۔ نگراں وزیراعظم کا کہنا تھا کہ آئندہ ہفتے پاکستان میں سرمایہ کاری سے متعلق اچھی خبریں ملیں گی، ہم نا صرف خطے بلکہ بیرون دنیا سے بھی سرمایہ کاری لا رہے ہیں۔ انوار الحق کاکڑ نے کہا کہ ایس آئی ایف سی کے ذریعے سرمایہ کاری پالیسی میں اصلاحات کیے جا رہے ہیں جب کہ حکومتی اخراجات میں کمی کے لئے مختلف لائحہ عمل وضع کیے گئے ہیں۔ اپنے بیان میں ان کا مزید کہنا تھا کہ ہمیں ہنرمند اور ذہین لوگوں کی صلاحیتوں کو بروئے کار لانا ہوگا، پاکستان میں میڈیا آزاد اور خود مختار ہے، معاشرتی اقدار کے فروغ کے لئے میڈیا کا کردار اہم ہوتا ہے، دنیا معاملات کو سوشل میڈیا کے ذریعے آگے بڑھا رہی ہے۔ اسرائیلی جارحیت پر نگراں وزیراعظم نے کہا کہ غزہ کی صورتحال بہت تشویش ناک ہے، چین میں بیلٹ اینڈ روڈ انیشیٹو فورم (بی آر آئی) کے موقع پر مختلف سربراہان مملکت سے ملاقاتیں ہوئی تھیں۔