اسلام آباد (لارڈ میڈیا) وفاقی وزیر برائے بحری امور محمد جنید انور چوہدری نے پورٹ قاسم اتھارٹی کے بورڈ اجلاس کی صدارت کی، جس میں کھیلوں کی پالیسی کا جائزہ لیا گیا اور قومی و ادارہ جاتی ضروریات کے مطابق جامع نظرثانی پر تبادلہ خیال کیا گیا۔
وزیر نے ہدایت کی کہ نظرثانی شدہ پالیسی میں ادارہ جاتی کھیل، کھلاڑیوں کی ترقی، کوچنگ اور تربیت، شفاف انتخابی طریقہ کار، کھیلوں کی سہولیات کی بہتری، کھلاڑیوں کے لیے مراعات اور ادارہ جاتی ذمہ داریوں کی واضح تعریف شامل ہو۔
انہوں نے پاکستانی بندرگاہوں کے لیے ایک متحدہ کھیل پالیسی کی تجویز دی اور پورٹ قاسم میں ٹیلنٹ ہنٹنگ کیمپ کے انعقاد کی ہدایت کی تاکہ باصلاحیت کھلاڑیوں کی نشاندہی کی جا سکے۔
چیئرمین پورٹ قاسم اتھارٹی ریئر ایڈمرل (ر) سید معظم الیاس نے اجلاس کو بتایا کہ اتھارٹی ایک کثیر المقاصد کھیل کمپلیکس قائم کرے گی جس میں کرکٹ، ہاکی، بیڈمنٹن، ٹیبل ٹینس، سوئمنگ، باسکٹ بال، اسکواش، ایتھلیٹکس اور فٹ بال شامل ہوں گے۔
بورڈ نے اس منصوبے کے لیے 9.6 ایکڑ پلاٹ مختص کیا ہے۔ پہلے مرحلے میں کرکٹ گراؤنڈ کی تعمیر کے لیے ٹینڈر جاری کیا جائے گا اور کم ترین بولی دینے والے کو کنٹریکٹ دیا جائے گا۔
مجوزہ پالیسی کے تحت کھیلوں کی ترقی اور سرگرمیوں کی نگرانی کے لیے ایک مخصوص ڈائریکٹوریٹ قائم کیا جائے گا۔ سینئر کھلاڑیوں کی خدمات کو کوچز کے طور پر استعمال کیا جائے گا تاکہ نئے بھرتی شدہ کھلاڑیوں کو تربیت دی جا سکے۔
وزیر نے مزید ہدایت کی کہ کراچی پورٹ ٹرسٹ اور پورٹ قاسم اتھارٹی کے کھلاڑیوں کو ملا کر ایک نئی بین الاقوامی سطح کی کرکٹ ٹیم تشکیل دی جائے۔
اجلاس میں پی کیو اے کے چیئرمین، ایچ آر کمیٹی کے اراکین اور دیگر بورڈ ممبران نے شرکت کی۔
