ممبئی (لارڈ میڈیا) مرزا پور: دی مووی کا طویل انتظار کے بعد ٹریلر جاری کر دیا گیا ہے جس میں کالین بھیا، منا بھیا اور گڈو پنڈت مرزا پور کی بادشاہت کے لیے آمنے سامنے نظر آ رہے ہیں۔ فلم کی کہانی مقبول ویب سیریز مرزا پور کی دنیا کو بڑے پردے پر زیادہ بڑے پیمانے پر پیش کرتی ہے، جہاں طاقت کی جنگ اور خطرناک مقابلے دیکھنے کو ملیں گے۔
ٹریلر میں پنکج ترپاٹھی کالین بھیا کے کردار میں مرزا پور کی گدی پر اپنی گرفت برقرار رکھنے کے لیے پرعزم دکھائی دیتے ہیں، جبکہ منا بھیا ایک بار پھر طاقت اور تخت کے وارث کے طور پر سامنے آنے کی کوشش کر رہے ہیں۔ دوسری جانب، علی فضل کا گڈو پنڈت مرزا پور کے تخت کے لیے سب سے بڑا خطرہ دکھائی دیتا ہے۔
ٹریلر میں پرانے کرداروں کے درمیان دشمنی کے ساتھ ساتھ نئی صف بندیوں، سازشوں، تشدد اور دھوکے کی جھلکیاں بھی دیکھنے کو ملتی ہیں۔ اس میں نئی کاسٹ بھی شامل کی گئی ہے، جن میں روی کشن نمایاں کردار ادا کر رہے ہیں۔ جتیندر کمار فلم میں ببلو کے کردار میں نظر آئیں گے جو اس کردار میں وکرانت میسی کی جگہ لے رہے ہیں۔
فلم 4 ستمبر 2026 کو سینما گھروں کی زینت بنے گی۔
