مکاؤ (شِنہوا) مکاؤ خصوصی انتظامی علاقے (ایس اے آر) کی حکومت نے پیر کے روز بتایا کہ چینی مرکزی حکومت 20 اگست کو ایس اے آر میں پیشہ ور سرمایہ کاروں کے لئے 6 ارب یوآن (تقریباً 88 کروڑ 40 لاکھ امریکی ڈالر) کے سرکاری بانڈز جاری کرے گی۔
چین کی وزارت خزانہ اور مکاؤ خصوصی انتظامی علاقے کی حکومت کی جانب سے جاری مشترکہ اعلامیے میں کہا گیا ہے کہ مکاؤ میں مسلسل پانچویں سال یوآن میں بانڈز کا اجرا مکاؤ کی مناسب اقتصادی تنوع اور اس کے منفرد مالیاتی شعبے کی مسابقتی صلاحیت بڑھانے کے لئے مرکزی حکومت کی مضبوط حمایت کا مظہر ہے۔
اعلامیے کے مطابق اس بار بانڈز کے اجرا کا ڈھانچہ زیادہ متنوع ہے، جس سے بانڈز کے باقاعدہ اجرا کے نظام میں مزید بہتری آئے گی اور سرمایہ کاروں کو یوآن میں زیادہ محفوظ اور مستحکم سرمایہ کاری کے مواقع میسر ہوں گے۔
