کراچی: میئر کراچی مرتضی وہاب نے کہا ہے کہ کراچی والوں سے کون سے وعدے کئے جو وفا نہیں ہوئے، ہر اعلان پورا کیا جا رہا ہے، منشور میں کہا تھا اختیارات کا رونا نہیں روئیں گے، 13اگست کو حب ڈیم کی نئی کینال کے افتتاح سے منگھوپیر، اورنگی، کیماڑی اور بلدیہ ٹائون کو وافر پانی ملے گا، بلدیاتی ادارے وہی ہیں صرف قیادت تبدیل ہونے سے کام میں پیشرفت ہوئی ہے۔
کراچی میں پریس کانفرنس کرتے ہوئے مرتضی وہاب نے کہا کہ سندھ حکومت نے کراچی کیلئے 10کروڑ گیلن یومیہ پانی وپڈا سے منظور کرایا ہے، 22سال قبل کراچی میں پانی کی سپلائی بہتر بنانے کیلئے کام ہوا تھا، اس وقت شہر کی آبادی 96 لاکھ تھی جبکہ اب کی مردم شماری کے مطابق شہر میں 3کروڑ کے قریب لوگ موجود ہیں۔
انہوں نے کہا کہ شہر کی آبادی میں تیزی سے اضافہ تو ہوا مگر پانی کی ترسیل میں اضافہ نہیں کیا گیا، ماضی میں سارا فوکس کینجھر سے متعلق تھا، 2005ء سے سن رہے ہیں کے 4آئیگا پانی لائیگا۔ انہوں نے کہا کہ اپنے منشور میں کہا تھا اختیارات کا رونا نہیں روئیں گے، ہم نے حکومت سے گزارش کی گزشتہ دنوں بارشیں ہوئیں حب ڈیم بھرا ہوا ہے مگر کراچی والوں کو پانی نہیں مل رہا تھا جس پر حب ڈیم سے یہ پانی شہر میں لایا گیا۔
انہوں نے کہا کہ لسبیلہ کینال حب ڈیم سے بلوچستان کو پانی دیتی ہے جبکہ 45 سال قبل بننے والی حب کینال کراچی والوں کو پانی کی سپلائی دیتی ہے، 13اگست کو حب ڈیم کی نئی کینال کا افتتاح کریں گے، نئی کینال سے منگھوپیر، اورنگی، کیماڑی اور بلدیہ ٹائون کو فائدہ ہو گا، کے تھری سے پانی دوسرے علاقوں کوبھی ملے گا۔
انہوں نے کہا کہ پرانی کینال کی بحالی کا کام بھی جاری ہے، پرانی کینال کی بحالی کا کام دسمبر تک مکمل کرلیا جائیگا، جو بھی اعلان کیا گیا اس کو پورا کیا جا رہا ہے۔ انہوں نے کہا کہ بلدیاتی ادارے وہی ہیں صرف قیادت تبدیل ہونے سے کام میں پیشرفت ہوئی۔انہوں نے سوال کیا کہ کراچی والوں سے کون کون سے وعدے کئے جو وفا نہیں ہوئے۔
