لاہور: یو اے ای اور پنجاب حکومت نے دوطرفہ تعاون کو فروغ دینے پر اتفاق کیا ہے جبکہ وزیراعلی مریم نوازنے اماراتی سرمایہ کاروں، اداروں اور کاروباری افراد کو پنجاب میں سرمایہ کاری کی دعوت دیتے ہوئے کہا کہ بزنس فرینڈلی ماحول کے باعث پنجاب سرمایہ کاری کیلئے ایک پرکشش مقام بن چکا ہے۔
مسلم لیگ (ن) کے صدر نواز شریف و وزیراعلی پنجاب مریم نواز سے پاکستان میں متحدہ عرب امارات کے سفیر حماد عبید ابراہیم سالم الزعابی نے ملاقات کی جس میں دوطرفہ تعاون کو فروغ دینے پر اتفاق اور تعلقات کو نئی بلندیوں تک لے جانے کے عزم کا اظہار کیا گیا۔
ملاقات میں باہمی برادرانہ تعلقات، اقتصادی شراکت داری، تعلیم، سائنس اور پائیدار ترقی جیسے شعبوں میں دوطرفہ تعاون کو مزید وسعت دینے پر تفصیلی تبادلہ خیال ہوا، نواز شریف اور مریم نواز نے صدر یو اے ای شیخ محمد بن زاید النہیان کی قیادت کو خراج تحسین پیش کیا اور متحدہ عرب امارات کی سائنسی ترقی، ماحول دوستی اور جدید وژن کو سراہا۔
اس موقع پر نواز شریف نے کہا ہے کہ پاکستان اور یو اے ای کا تعلق محض سفارتی نہیں بلکہ دلوں کا رشتہ ہے جو ہر آزمائش میں کامیابی سے ہمکنار رہا ہے جبکہ وزیراعلی مریم نواز نے کہا ہے کہ تعلیم، تحقیق اور ماحولیات کے میدان میں باہمی اشتراک عمل کو مزید وسعت دی جائے گی۔
مریم نواز نے یو اے ای کے ساتھ سرکاری و سفارتی پاسپورٹ ہولڈرز کیلئے ویزا فری انٹری کی سہولت کو قابل تحسین قرار دیتے ہوئے کہا کہ دوطرفہ تجارتی حجم میں اضافہ خوش آئند ہے، پنجاب میں تعلیم، صحت، انفرااسٹرکچر اور قابل تجدید توانائی کے شعبوں میں نمایاں جدت لائی گئی ہے۔
انہوں نے متحدہ عرب امارات کے سرمایہ کاروں، اداروں اور کاروباری برادری کو پنجاب میں سرمایہ کاری کی دعوت دیتے ہوئے کہا کہ بزنس فرینڈلی ماحول کے باعث پنجاب سرمایہ کاری کیلئے ایک پرکشش مقام بن چکا ہے۔
