اسلام آباد (لارڈ میڈیا) پاکستان نے بھارتی وزیر دفاع کے حالیہ بیان کو سختی سے مسترد کرتے ہوئے اسے اشتعال انگیز، غیر ذمہ دارانہ اور خطے کے امن کے لیے خطرہ قرار دیا ہے۔ دفتر خارجہ نے کہا ہے کہ ہر جارحیت کا منہ توڑ جواب دیا جائے گا۔
دفتر خارجہ کی جانب سے جاری بیان میں کہا گیا ہے کہ بھارتی وزیر دفاع کے ریمارکس جموں و کشمیر کے تنازع کی حقیقت کو مسخ کرتے ہیں، جو اقوام متحدہ کی سلامتی کونسل کے ایجنڈے پر موجود ایک بین الاقوامی طور پر تسلیم شدہ مسئلہ ہے۔ بھارتی حکومت کا یہ رویہ خطے اور دنیا کے امن و سلامتی کو خطرے میں ڈالنے کی پالیسی پر عمل پیرا ہے۔
بیان میں کہا گیا کہ اس قسم کے بیانات بھارت کے زیر انتظام جموں و کشمیر میں جاری قبضے، خطے میں دہشت گردی کی مبینہ سرپرستی اور بھارت کے اندرونی مسائل سے عالمی توجہ ہٹانے کی کوشش ہیں۔
دفتر خارجہ نے کہا کہ بھارت کو جارحانہ بیانات اور دھمکی آمیز رویے کے بجائے زمینی حقائق کا ادراک کرنا چاہیے۔ پاکستان کی حکومت، عوام اور مسلح افواج کسی بھی ممکنہ مہم جوئی کا بھرپور جواب دینے کی مکمل صلاحیت اور عزم رکھتے ہیں۔
بیان میں گزشتہ سال کے آپریشن "بنیان مرصوص” کا حوالہ دیتے ہوئے کہا گیا کہ پاکستان پہلے بھی اپنے دفاع کے عزم کا عملی مظاہرہ کر چکا ہے۔
پاکستان نے عالمی برادری، خصوصاً اقوام متحدہ، سے مطالبہ کیا کہ وہ بھارت کے مسلسل غیر ذمہ دارانہ طرز عمل کا نوٹس لے اور اسے سلامتی کونسل کی متعلقہ قراردادوں پر عمل درآمد نہ کرنے پر جوابدہ ٹھہرائے۔ بیان میں کشمیری عوام کے حق خودارادیت کو یقینی بنانے کی بھی اپیل کی گئی۔
