کراچی: ہدایتکار میثم نقوی نے کہا ہے کہ ڈراما پرورش والدین کی تربیت کے مسائل اور نئی نسل کو درپیش چیلنجز پر مبنی ہے، بہت سے لوگ اس کہانی کو اپنی زندگی سے قریب محسوس کر رہے ہیں، والدین گھر میں ایسا ماحول پیدا کریں کہ بچے ان سے چھپ کر کبھی بھی کچھ نہ کریں۔
ڈراما پرورش میں نوجوانوں کے درمیان رومانس دکھانے پر ناظرین کی جانب سے تنقید کے جواب میں انہوں نے کہا کہ ڈراما دراصل نوعمری کی محبت کے بارے میں نہیں ہے، لیکن چونکہ یہ عمر ایسی ہوتی ہے جس میں نوجوان کسی نہ کسی کی جانب مائل ہوتے ہیں اور ایسا دنیا بھر میں ہوتا ہے، تو ہم نے اس حقیقت کو ٹی وی پر دکھانے کی کوشش کی ہے۔
ہدایتکار کے مطابق جب بھی نوجوان کسی کی جانب مائل ہوتے ہیں تو والدین کی جانب سے ان پر سختی کی جاتی ہے اور وہ ان پر پابندیاں لگانے کی کوشش کرتے ہیں، جس سے بچے باغی ہو جاتے ہیں۔
ان کے خیال میں والدین کو چاہیے کہ اس عمر کے بچوں سے زیادہ قریب ہوں، انھیں اپنے مشوروں میں شامل کریں، کیونکہ یہ بچے جس دور میں پیدا ہوئے ہیں، ان میں شعور بہت جلدی آ جاتا ہے، جو کہ پرانے وقتوں میں کافی سال گزرنے کے بعد آتا تھا، جب کہ جتنے جدید دور میں یہ بچے پیدا ہوئے ہیں، یہ بہت جلدی چیزوں کو سمجھ جاتے ہیں اور ان پر ایک اچھا مشورہ بھی دے سکتے ہیں۔
