اسلام آباد (شِنہوا) پاکستان کے نائب وزیراعظم اور وزیر خارجہ اسحاق ڈار نے بدھ کے روز اسلام آباد میں شنگھائی تعاون تنظیم کے سیکرٹری جنرل نورلان یرمیک بائیف سے ملاقات کے دوران اس بات کا اعادہ کیا کہ پاکستان ایس سی او کے مقاصد آگے بڑھانے کے لئے پرعزم ہے۔
پاکستان کی وزارت خارجہ کے مطابق دونوں رہنماؤں نے تنظیم کی ترجیحات پر تبادلہ خیال کیا۔ انہوں نے رکن ممالک کے درمیان معیشت، نقل و حمل اور علاقائی روابط جیسے اہم شعبوں میں تعاون مضبوط بنانے پر بھی بات چیت کی۔
ملاقات میں علاقائی اور عالمی صورتحال پر بھی تبادلہ خیال کیا گیا۔ سیکرٹری جنرل نورلان یرمیک بائیف نے علاقائی امن، استحکام اور باہمی تعاون کو فروغ دینے کے لئے پاکستان کے تعمیری کردار کی تعریف کی۔
شنگھائی تعاون تنظیم کے سیکرٹری جنرل نے اسحاق ڈار کو بشکیک (کرغزستان) میں ایس سی او وزرائے خارجہ کونسل کے اجلاس کی تیاریوں کے بارے میں بریفنگ دی اور تنظیم کی کارکردگی و افادیت مزید بہتر بنانے کے لئے تجاویز بھی پیش کیں۔
اسحاق ڈار نے اس بات کا اعادہ کیا کہ رواں سال ستمبر میں پاکستان ایس سی او سربراہان مملکت کی کونسل کی صدارت سنبھالنے سے قبل تمام رکن ممالک کے ساتھ مل کر کام کرنے کے لئے تیار ہے۔
وزارت خارجہ کے بیان کے مطابق اسحاق ڈار نے یہ عزم بھی دہرایا کہ پاکستان 2027 میں ایس سی او سربراہی اجلاس کی میزبانی کے لئے مکمل تیار ہے۔
