سینٹ پیٹرزبرگ (شِنہوا) بین الاقوامی جوہری توانائی ایجنسی (آئی اے ای اے) کے ڈائریکٹر جنرل رافیل گروسی نے کہا ہے کہ دنیا میں کہیں بھی واقع کسی بھی جوہری بجلی گھر پر حملہ ناقابل قبول ہے۔
روس کے علاقے کالینن گراڈ میں روسی سرکاری جوہری توانائی کارپوریشن روساتوم کے ڈائریکٹر جنرل الیکسی لیخاچیوف سے ملاقات کے بعد گفتگو کرتے ہوئے گروسی نے کہا کہ آئی اے ای اے نے ایران کے بوشہر جوہری بجلی گھر پر کسی براہ راست حملے کا نہ تو مشاہدہ کیا ہے اور نہ ہی اس کی تصدیق کی ہے۔ انہوں نے تمام فریقوں پر زور دیا کہ وہ انتہائی تحمل کا مظاہرہ کریں۔
انہوں نے کہا کہ آئی اے ای اے روساتوم کی طرح اس جوہری تنصیب کی صورتحال پر گہری نظر رکھے ہوئے ہے۔
گروسی نے کہا کہ "کسی بھی جوہری تنصیب کی سلامتی جوہری تحفظ اور سلامتی کے لئے اولین ترجیح ہے۔” انہوں نے اس بات کا اعادہ کیا کہ ایسی کسی بھی کارروائی، جو جوہری تنصیب کی سالمیت کو متاثر کرے، "قطعی طور پر ناقابل قبول” ہے۔
انہوں نے کہا کہ اس معاملے پر آئی اے ای اے کا موقف بالکل واضح ہے اور اس پر مسلسل اقوام متحدہ کی سلامتی کونسل اور آئی اے ای اے کے بورڈ آف گورنرز میں بھی بات چیت ہوتی رہی ہے۔
