اسلام آباد (شِنہوا) بلوچستان کے ضلع شیرانی میں ایک مسافر بس کھائی میں گرنے سے کم از کم 40 افراد جاں بحق اور 8 زخمی ہو گئے۔
بلوچستان کے وزیراعلیٰ کے معاون برائے سیاسی و میڈیا امور شاہد رند نے شِنہوا کو بتایا کہ زخمیوں کو ہسپتال لے جاتے ہوئے اور وہاں علاج کے دوران دم توڑنے کے باعث اموات کی تعداد میں اضافہ ہوا۔
اس سے قبل ضلع کے ڈپٹی کمشنر حضرت ولی کاکڑ نے بتایا کہ یہ حادثہ ژوب-شیرانی ہائی وے پر دھانہ سر کے مقام پر پیش آیا جو بلوچستان کے ضلع شیرانی اور خیبر پختونخوا کے ضلع ڈیرہ اسماعیل خان کی سرحد پر واقع ہے۔
دونوں اضلاع کی پولیس اور امدادی ٹیمیں موقع پر پہنچ گئیں اور لاشوں اور زخمیوں کو قریبی ہسپتالوں میں منتقل کیا، جاں بحق ہونے والوں میں خواتین اور بچے بھی شامل ہیں۔
ایک امدادی اہلکار نے بتایا کہ یہ حادثہ دشوار گزار پہاڑی علاقے میں پیش آیا اور امدادی ٹیموں کو جائے حادثہ تک پہنچنے میں دو گھنٹے سے زائد وقت لگا۔
مقامی پولیس حکام نے بتایا کہ یہ حادثہ اس وقت پیش آیا جب بس پہاڑی علاقے میں ایک موڑ پر ڈرائیور سے بےقابو ہو گئی۔
بس بلوچستان کے دارالحکومت کوئٹہ سے خیبر پختونخوا کے شہر پشاور جا رہی تھی۔
ڈپٹی کمشنر نے بتایا کہ بس کوئٹہ سے 36 مسافروں کے ساتھ روانہ ہوئی تھی اور راستے میں مزید مسافر بھی اس میں سوار ہوئے۔
بلوچستان کی صوبائی حکومت نے اس جانی نقصان پر افسوس اور سوگوار خاندانوں سے تعزیت کا اظہار کیا ہے۔
صدر پاکستان آصف زرداری نے اس حادثے پر گہرے دکھ کا اظہار کیا ہے۔ انہوں نے سوگوار خاندانوں سے تعزیت اور متاثرین کے ساتھ ساتھ زخمیوں کی جلد صحت یابی کی دعا کی۔
صدر نے حکام کو ہدایت کی کہ زخمیوں کو بہترین طبی سہولیات فراہم کی جائیں۔ انہوں نے کہا کہ پوری قوم متاثرہ خاندانوں کے ساتھ کھڑی ہے۔
