اسلام آباد: پاکستان اور انڈونیشیاء نے اقتصادی تعلقات ،تجارت، دفاع اور دفاعی پیداوار سمیت تمام شعبوں میں دو طرفہ تعاون کو مزید فروغ دینے کے عزم کا اعادہ کیا ہے۔ جاری بیان کے مطابق وزیراعظم شہباز شریف سے سے انڈونیشیا کے وزیر دفاع لیفٹیننٹ جنرل (ر)سیافری سمسودین نے ملاقات کی جس میں تمام شعبوں میں دو طرفہ تعاون کو مزید فروغ دینے کے عزم کا اعادہ کیا گیا۔
وزیراعظم نے انڈونیشین صدر پرابووو سوبیانٹوو کیساتھ قاہرہ میںجی ایٹ سربراہی اجلاس کے موقع پر خوشگوار ملاقات کو یاد کرتے ہوئے نے ان کیلئے نیک خواہشات کا اظہار کیا۔
ملاقات میں پاکستان اور انڈونیشیا کے درمیان گہرے تاریخی، برادرانہ اور دوستانہ دوطرفہ تعلقات پر گفتگو کرتے ہوئے وزیراعظم نے کہا کہ پاکستان اور انڈونیشیا کے درمیان مشترکہ ثقافت، مذہب اور تاریخی رشتوں پر مبنی دیرینہ دوستانہ تعلقات ہیں اور دونوں ممالک بین الاقوامی فورمز پر ایک دوسرے کی حمایت کرتے ہیں۔
وزیراعظم نے انڈونیشیا کیساتھ اقتصادی و تزویراتی تعلقات اور تجارت، دفاع اور دفاعی پیداوار سمیت تمام شعبوں میں دو طرفہ تعاون کو مزید فروغ دینے کے عزم کا اعادہ کیا، وزیراعظم نے کثیر جہتی دوطرفہ تعاون بڑھانے ،باہمی فائدہ مند منصوبوں میں سرمایہ کاری کیلئے انڈونیشیا کیساتھ تعاون کو مزید فروغ دینے پر زور دیا۔
ملاقات میں دونوں ممالک کے مابین دفاعی تعاون کے معاہدے کے تحت جاری اقدامات کا بھی جائزہ لیا ،دونوں رہنماؤں نے معاہدے کے نفاذ کو تیز کرنے پر اتفاق کیا۔
اس موقع پر انڈونیشین وزیر دفاع لیفٹیننٹ جنرل (ر)سیفری سمسودین نے انڈونیشین صدر پرابوو سوبیانٹو کی جانب سے وزیراعظم اور پاکستانی عوام کیلئے نیک خواہشات کا اظہار کرتے ہوئے کہا کہ انڈونیشیا پاکستان کیساتھ دفاعی تعلقات کو مزید مضبوط بنانے اور مختلف شعبوں خصوصا دفاعی پیداوار میں تعاون کے مزید مواقع تلاش کرنے کاخواہشمند ہے۔
