منیلا (شِنہوا) فلپائن کی نیشنل ڈیزاسٹر رسک ریڈکشن اینڈ مینجمنٹ کونسل نے بتایا ہے کہ فلپائن کے جزیرے منڈاناؤ کے جنوبی ساحل پر آنے والے 7.8 شدت کے شدید زلزلے کے نتیجے میں ہلاک ہونےوالوں کی تعداد 61 ہوگئی ہے جبکہ 40 لاپتہ اور 1,403 زخمی ہیں۔
کونسل کے مطابق زلزلے سے ایک لاکھ 73 ہزار سے زائد خاندان یا تقریباً 7 لاکھ 24ہزار افراد متاثر ہوئے ہیں۔ تقریباً 54 ہزار گھروں کو نقصان پہنچا ہے جن میں سے 10ہزار گھروں کو مکمل طور پر تباہ قرار دیا گیا ہے۔
کونسل نے مزید بتایا کہ مجموعی طور پر بنیادی ڈھانچے کی 725 سہولیات کو نقصان پہنچا ہے، جس سے ایک ارب پیسو (تقریباً ایک کروڑ 62 لاکھ امریکی ڈالر) کا نقصان ہوا ہے۔ دوسری طرف متاثرہ خاندانوں کو 6 کروڑ 76 لاکھ پیسو مالیت کی امداد فراہم کی جا چکی ہے اور متاثرہ علاقوں کی 13 بلدیات اور شہروں میں ہنگامی حالت نافذ کر دی گئی ہے۔
فلپائن انسٹی ٹیوٹ آف وولکانولوجی اینڈ سیزمولوجی کے مطابق یہ زلزلہ مقامی وقت کے مطابق صبح 7 بج کر 37 منٹ پر 33 کلومیٹر کی گہرائی میں آیا جبکہ اس کا مرکز جزیرہ منڈاناؤ کے صوبے سرنگانی میں ماصم قصبے کے ساحل سے 32 کلومیٹر جنوب مغرب میں تھا۔
فلپائن بحر الکاہل کے "رنگ آف فائر” پر واقع ہونے کی وجہ سے اکثر زلزلوں کی زد میں رہتا ہے، یہ ٹیکٹونک پلیٹوں کی حدود کا ایک ایسا خطہ ہے جو شدید زلزلوں اور آتش فشاں پھٹنے کے لئے جانا جاتا ہے۔
