منیلا (شِنہوا) فلپائن کے جزیرے منڈاناؤ کے جنوبی ساحل میں آنے والے 7.8 شدت کے زلزلے کے نتیجے میں ہلاکتوں کی تعداد 45 ہوگئی جبکہ 17 افراد لاپتہ اور 487 زخمی ہوئے ہیں۔
فلپائن کی نیشنل ڈیزاسٹر رسک ریڈکشن اینڈ مینجمنٹ کونسل (این ڈی آر آر ایم سی) کے مطابق زلزلے سے 33 ہزار سے زائد گھرانے یعنی تقریباً ڈیڑھ لاکھ افراد متاثر ہوئے ہیں جبکہ 41 ہزار سے زیادہ متاثرہ افراد بے گھر ہو چکے ہیں۔ املاک کے نقصان کے حوالے سے 238 بنیادی ڈھانچے متاثر ہوئے ہیں جن میں ہسپتال، سکول اور پل شامل ہیں جبکہ تقریباً 3 ہزار مکانات کو بھی نقصان پہنچا ہے۔
کونسل نے مزید بتایا کہ زلزلے کے جھٹکے منڈاناؤ کے بیشتر علاقوں اور وسطی فلپائن کے بعض حصوں میں محسوس کئے گئے جبکہ مرکزی زلزلے کے بعد اب تک ایک ہزار 700 سے زائد آفٹر شاکس ریکارڈ کئے جا چکے ہیں۔ متاثرہ علاقوں میں تلاش اور امدادی کارروائیاں جاری ہیں۔
