مکہ مکرمہ (لارڈ میڈیا): پاکستانی اداکارہ درفشاں سلیم نے حج کی ادائیگی کے بعد اپنے جذبات سوشل میڈیا پر شیئر کیے ہیں۔ درفشاں نے انسٹاگرام پر پیغام کے ساتھ تصاویر شیئر کیں، جہاں انہوں نے حج کو صبر، شکر اور توکل کی داستان قرار دیا ہے۔ انہوں نے کہا کہ یہ سفر انہوں نے اپنے والدین کے ساتھ کیا، جن میں ان سے زیادہ ہمت تھی، جبکہ وہ پہلے دن ہی بیمار ہو گئیں۔
درفشاں نے بتایا کہ حج کے دوران انہوں نے کئی شاندار لڑکیوں سے ملاقات کی، جہاں سب نے مل کر دعائیں کیں، ہنسی مذاق کیا اور کھانا کھایا۔ انہوں نے کہا کہ یہ موقع عمل کے ذریعے دین کو سمجھنے کا تھا۔
درفشاں نے کہا کہ وہ اپنے ساتھ جذباتی وابستگیوں سے آزاد ہو کر جا رہی ہیں اور حج نے انہیں اللہ کے فیصلوں کے سامنے سپردگی کرنا سکھایا ہے۔ ان کا کہنا تھا کہ جسم تھکن سے چُور ہے، لیکن دل مطمئن اور مسرور ہے۔
انہوں نے مداحوں کو حج کی مبارک باد دیتے ہوئے دعا کی کہ اللہ ہم سب کو اس فرض کی ادائیگی کی سعادت عطا فرمائے اور یہ سفر ہمارے ظاہر و باطن کو بدل دے۔ آمین۔
