شنگھائی (شِنہوا) ایس اے آئی سی موٹر 10 کروڑ گاڑیوں کی مجموعی فروخت اور پیداوار کا ہدف عبور کرنے والی پہلی چینی کار ساز کمپنی بن گئی جو چین کی گاڑیوں کی صنعت کے لئے ایک اہم سنگ میل ہے۔ یہ صنعت عالمی سطح پر اپنے قدم جما رہی ہے اور الیکٹرک گاڑیوں کی جانب تیزی سے بڑھ رہی ہے۔
کمپنی نے شنگھائی میں اس موقع کو اپنی 10 کروڑ ویں گاڑی آئی ایم موٹرز کی تیار کردہ آئی ایم ایل ایس 9 ہائپر ایکسٹینڈڈ رینج سپورٹ یوٹیلیٹی گاڑی اپنے صارف کاؤ شو ڈونگ کے حوالے کر کے منایا، جو خودکار ڈرائیونگ سٹارٹ اپ ’’مومنٹا‘‘ کے چیف ایگزیکٹو آفیسر ہیں۔
یہ کامیابی چین کے گاڑیوں کے شعبے کی تیز رفتار ترقی کو ظاہر کرتی ہے جو ایک چھوٹی مقامی صنعت سے ترقی کرتے ہوئے دنیا کی سب سے بڑی گاڑیوں کی منڈی اور ایک بڑے برآمد کنندہ ملک میں تبدیل ہو چکا ہے۔ مسابقتی الیکٹرک گاڑیوں کے بڑھتے ہوئے انتخاب کے باعث بہت سی چینی آٹو کمپنیاں عالمی معروف برانڈز سے زیادہ مارکیٹ شیئر حاصل کر رہی ہیں۔
چائنہ پیسنجر کار ایسوسی ایشن کے سیکرٹری جنرل چوئی ڈونگ شو نے کہا کہ ’’10 کروڑ گاڑیوں کا ہدف اختتام نہیں بلکہ چین کی آٹو صنعت کے لئے نئی بلندیوں کی جانب ایک نقطہ آغاز ہے۔‘‘
چوئی نے کہا کہ ایک چھوٹے مقامی کارخانے سے فارچیون گلوبل 500 کمپنی بننے تک ایس اے آئی سی موٹر چین کی گاڑیوں کی صنعت بلکہ مجموعی مینوفیکچرنگ شعبے کی بڑھتی ہوئی عالمی مسابقت کی بہترین مثال ہے۔
چوئی نے مزید کہا کہ ’’چین اب باضابطہ طور پر عالمی آٹو صنعت کی پہلی صف میں شامل ہو چکا ہے۔‘‘
