لہاسا (شِنہوا) چین کے جنوب مغربی شی زانگ خود مختار علاقے کے شہر چھمدو میں منگل کے روز شی زانگ-گوانگ ڈونگ الٹرا ہائی وولٹیج پاور ٹرانسمیشن لائن کے شی زانگ سیکشن کی تعمیر کا آغاز کر دیا گیا۔ یہ لائن 2,681 کلومیٹر طویل ہے جو شی زانگ کی وسیع پیمانے پر موجود صاف توانائی کی بدولت گوانگ ڈونگ-ہانگ کانگ-مکاؤ عظیم تر خلیجی علاقہ کو بجلی فراہم کرے گی۔
53.2 ارب یوآن( تقریباً 7.76 ارب امریکی ڈالر) کی مجموعی سرمایہ کاری اور ایک کروڑ کلو واٹ کی ترسیلی صلاحیت کے حامل اس منصوبے کو توانائی کی ایک بڑی شہ رگ قرار دیا جا رہا ہے جو صوبہ یون نان اور گوانگ شی زوانگ خود مختار علاقے کے ذریعے شی زانگ کو چین کے جنوبی صوبے گوانگ ڈونگ سے جوڑے گا۔
شی زانگ سیکشن کی ترسیلی صلاحیت 2028 تک مکمل کرنے کا ہدف ہے اور یہ منصوبہ 2029 میں مکمل طور پر فعال ہو جائے گا۔ اس میں مجموعی طور پر 301.7 کلومیٹر طویل 2 الٹرا ہائی وولٹیج لائنیں شامل ہوں گی جو سمندر سے 1,900 میٹر سے لے کر 4,800 میٹر تک کی بلندی پر واقع ہوں گی۔ اس کے علاوہ بالترتیب 80 لاکھ کلو واٹ اور 50 لاکھ کلو واٹ کی صلاحیت کے حامل 2 کنورٹر سٹیشنز بھی تعمیر کئے جائیں گے۔
سٹیٹ گرڈ شی زانگ الیکٹرک پاور کمپنی لمیٹڈ کے مطابق تکمیل کے بعد اس منصوبے سے سالانہ 43 ارب کلو واٹ آور (کے ڈبلیو ایچ)صاف بجلی شی زانگ سے عظیم تر خلیجی علاقہ کو فراہم کی جائے گی جس سے کاربن ڈائی آکسائیڈ کے اخراج میں 3 کروڑ 30 لاکھ ٹن تک کمی واقع ہوگی۔
اس منصوبے کے گوانگ ڈونگ سیکشن کی تعمیر ستمبر 2025 میں شروع کی گئی تھی۔
