تہران (شِنہوا) ایران نے امریکہ کی جانب سے کھلے سمندر میں ایرانی تیل لے جانے والے جہازوں کو ضبط کرنے کی سخت مذمت کی ہے۔
ایرانی وزارت خارجہ کے ترجمان اسماعیل بقائی نے سوشل میڈیا پلیٹ فارم ایکس پر کہا کہ "یہ کھلے عام سمندری قزاقی اور مسلح ڈکیتی کو قانونی شکل دینے کے مترادف ہے۔ قزاقوں کی واپسی پر خوش آمدید ، فرق صرف یہ ہے کہ اب وہ سرکاری وارنٹس کے ساتھ کام کرتے ہیں، سرکاری جھنڈوں تلے سفر کرتے ہیں اور اپنی لوٹ مار کو ‘قانون کا نفاذ’ کہتے ہیں۔”
اسماعیل بقائی نے کہا کہ امریکہ کو اس "بے باک غیر قانونی رویے” پر مکمل طور پر جوابدہ ٹھہرایا جانا چاہیے، جو بین الاقوامی قانون اور آزاد عالمی تجارت کے بنیادی اصولوں پر ضرب لگاتا ہے اور سمندری سلامتی کے بنیادی اصولوں کو خطرے میں ڈالتا ہے۔
جمعہ کے روز ضلع کولمبیا کے لئے امریکی اٹارنی جینین پیرو نے ایکس پر کہا کہ امریکی افواج نے ضبطی کے وارنٹس کی بنیاد پر بحر ہند میں 2 ٹینکرز کو روکا جن میں سے ہر ایک تقریباً 19 لاکھ بیرل ایرانی تیل لے جا رہا تھا۔
اپنی پوسٹ میں پیرو نے کہا کہ "ہم ان معاملات کی انتھک تحقیقات، نگرانی اور پیروی جاری رکھیں گے اور ہر قانونی اختیار استعمال کریں گے تاکہ پابندیوں کی زد میں آنے والے عناصر اور دہشت گردی کی حمایت کرنے والوں کو جوابدہ ٹھہرایا جا سکے اور انہیں غیر قانونی سمندری سرگرمیوں سے منافع کمانے سے روکا جا سکے۔”
