بیجنگ (شِنہوا) چین کی وزارت عوامی تحفظ (ایم پی ایس) نے کہا ہے کہ سری لنکا کی پولیس نے حالیہ دنوں میں ٹیلی کام فراڈ میں ملوث ہونے کے شبے میں گرفتار کئے گئے 125 افراد کو چین واپس بھیج دیا ہے۔
ایم پی ایس کے مطابق ان مشتبہ افراد کو 29 مارچ کو سری لنکا میں چینی سفارت خانے اور چینی پولیس کے تعاون سے واپس بھیجا گیا۔
ایم پی ایس نے کہا کہ یہ مشترکہ کارروائی چین اور سری لنکا کی پولیس کے درمیان قانون کے نفاذ کے لئے تعاون کو مزید مضبوط بنانے کا نتیجہ ہے جس کا مقصد سرحد پار ٹیلی کام فراڈ کے خلاف کارروائیوں کو تیز کرنا ہے۔
رواں سال کے آغاز سے دونوں ممالک کی پولیس نے اس رجحان کے پیش نظر تعاون بڑھا دیا ہے کہ ٹیلی کام فراڈ اور اس سے متعلق زیر زمین سرگرمیوں میں ملوث کچھ افراد دیگر ممالک سے سری لنکا منتقل ہو رہے ہیں۔
ایم پی ایس کے مطابق حال ہی میں سری لنکا کی پولیس نے متعدد کارروائیاں کرتے ہوئے فراڈ کے کئی اڈوں کو ختم کیا اور ٹیلی کام فراڈ میں ملوث متعدد افراد کو گرفتار کیا۔
چین کے وسطی صوبے ہوبے کے عوامی تحفظ کے اداروں نے ان افراد کی واپسی کے عمل میں حصہ لیا اور وہ ان کیسز کی تحقیقات کر رہے ہیں۔
ایم پی ایس کے ایک عہدیدار نے اس عزم کا اظہار کیا کہ مزید ممالک کے ساتھ قانون نافذ کرنے والے تعاون کو مضبوط بنایا جائے گا اور سرحد پار جرائم کے خلاف مشترکہ طور پر ایک موثر اور عملی نیا فریم ورک قائم کیا جائے گا۔
