گوانگ ژو (شِنہوا) چین کی گھریلو برقی آلات بنانے والی بڑی کمپنی مڈیا گروپ نے 2025 میں شیئر ہولڈرز سے منسوب خالص منافع میں سالانہ بنیاد پر 14 فیصد اضافہ ریکارڈ کیا جو 43.95 ارب یوآن (6.4 ارب امریکی ڈالر) تک پہنچ گیا۔
رپورٹ کے مطابق منگل کو شین زین سٹاک ایکسچینج کو جمع کرائی گئی دستاویز میں بتایا گیا ہے کہ اسی عرصے کے دوران گروپ کی مجموعی آمدنی 458.5 ارب یوآن رہی جو گزشتہ سال کے مقابلے میں 12.1 فیصد زیادہ ہے۔
رپورٹ میں کہا گیا ہے کہ کمپنی کی بیرون ملک آمدنی 195.9 ارب یوآن تک پہنچ گئی جو گزشتہ سال سے 15.9 فیصد اضافہ ظاہر کرتی ہے۔
رپورٹ کے مطابق 2025 میں مڈیا نے گھریلو ایئر کنڈیشنر کمپریسرز، گھریلو ایئر کنڈیشنر موٹرز اور واشنگ مشین موٹرز کی فروخت کے لحاظ سے عالمی مارکیٹ میں سب سے بڑا حصہ برقرار رکھا۔ اس کے علاوہ سنٹرل ایئر کنڈیشننگ کے شعبے میں بھی مقامی مارکیٹ میں اس کا پہلا نمبر رہا۔
مصنوعی ذہانت (اے آئی) کی بدولت کمپنی نے 2025 میں کارکردگی میں ایک کروڑ 50 لاکھ گھنٹوں سے زائد بہتری حاصل کی اور اخراجات میں 70 کروڑ یوآن کی کمی کی۔ گروپ نے اپنی عالمی مسابقت کو مضبوط بنانے کے لئے آئندہ 3 برسوں میں جدید تحقیق پر 60 ارب یوآن سے زیادہ سرمایہ کاری کرنے کا منصوبہ بنایا ہے۔
مڈیا گروپ 2025 کی فارچون گلوبل 500 فہرست میں 246 ویں نمبر پر رہا جو دنیا کی سرفہرست 500 کمپنیوں میں اس کی مسلسل دسویں شمولیت کو ظاہر کرتا ہے۔
