لاہور: اداکارہ مشی خان نے فنکاروں کی عمرپر تنقید کرنے والوں کو کرارا جواب دیتے ہوئے کہا ہے کہ پاکستان میں 40 سال کا ہونا جیسے گناہ بن گیا ہے، کیا 40 کے بعد زندگی ختم ہو جاتی ہے؟ کیا 30 کے بعد مر جانا چاہیے؟ جو لوگ دوسروں پر انگلیاں اٹھا رہے ہیں، وہ پہلے آئینے میں اپنا چہرہ دیکھیں۔
مشی خان نے انسٹاگرام پر شیئر کی گئی ایک ویڈیو میں فنکاروں کی عمر کو نشانہ بنانے پر سخت ردعمل دیا ہے۔ مشی خان نے کہا کہ پاکستان میں 40 سال کے بعد اداکاری کرنا گویا جرم بنادیا گیا ہے، جب کہ ہمارے پڑوسی ملک بھارت میں فنکاروں کی عمر پر تنقید نہیں کی جاتی۔
انہوں نے کہا کہ بولی وڈ میں اب بھی کئی اداکارائیں خاصی عمر کے باوجود فلموں اور ٹی وی پروگرامز میں کام کر رہی ہیں، لیکن وہاں کوئی بھی ان کی عمر کو بنیاد بنا کر تنقید نہیں کرتا۔ اداکارہ کے مطابق فلم لو گرو ایک اچھی فلم ہے اور اگر اس پر کسی پہلو سے تنقید کی جانی ہے تو وہ فلم کے معیار یا تکنیکی پہلو ہوں، نہ کہ ماہرہ خان اور ہمایوں سعید کی عمر۔
اداکارہ نے فلم لو گرو پر تبصرہ کرتے ہوئے ایک ویڈیو بھی جاری کی، جس میں انہوں نے فلم کے معیار، کہانی، مقامات اور اداکاروں کی کارکردگی کو خوب سراہا۔ مشی خان نے یہ بھی کہا کہ سوشل میڈیا پر ہر کوئی بس تنقید میں لگا ہوا ہے، خدارا! اپنے اداکاروں کو سپورٹ کریں۔
