غزہ (شِنہوا) غزہ کی نئی قائم شدہ انتظامی کمیٹی کے ارکان "تکنیکی مسائل” کے باعث رفح بارڈر کراسنگ کے ذریعے غزہ میں داخل نہیں ہو پا رہے۔
غزہ کے انتظام کی قومی کمیٹی کے رکن عائد یاغی نے شِنہوا کو بتایا کہ یہ گروپ غیر واضح "تکنیکی مسائل اور رکاوٹوں” کے باعث تاحال قاہرہ میں موجود ہے۔ انہوں نے امید ظاہر کی کہ یہ 15 رکنی کمیٹی آئندہ چند دنوں میں غزہ میں داخل ہو سکے گی۔
کمیٹی کے ایک اور رکن نے نام ظاہر نہ کرنے کی شرط پر بتایا کہ تاحال کمیٹی کے پاس نہ کوئی ہیڈکوارٹر اور نہ ہی آپریشنل بجٹ ہے۔ انہوں نے مزید کہا کہ ابھی تک کوئی مالی معاونت موصول نہیں ہوئی تاہم کمیٹی کو توقع ہے کہ وہ جلد غزہ شہر میں ایک عمارت کرائے پر حاصل کر لے گی۔
غزہ پہنچنے کے بعد کمیٹی کے ارکان فلسطینی دھڑوں اور سرکاری اداروں سے ملاقات کریں گے تاکہ وزارتوں اور دفاتر کی منتقلی کے عمل کو مربوط کیا جا سکے۔
