راشد نسیم پاکستانی تاریخ میں انفرادی طور پر 150 گنیز ورلڈ ریکارڈ قائم کرنیوالے پہلے کھلاڑی بن گئے ہیں۔
گنیز ورلڈ ریکارڈ کے آفیشل ڈیٹا اور ویب سائٹ کے مطابق راشد نسیم کے علاوہ کسی بھی کھلاڑی کے 150 عالمی ریکارڈ مکمل نہیں ہوئے، راشد نسیم نے انگلینڈ کے کھلاڑی جوش لیایا کا ہاتھوں میں ایک کلو وزن پکڑ کر 333پنچ مارنے کا عالمی ریکارڈ بھی توڑ دیا، انہوں نے ایک منٹ میں 340 فل ایکسٹینشن پنچ ٹارگٹ پر ہٹ کئے، گنیز ورلڈ ریکارڈ نے راشد نسیم کے دو مزید عالمی ریکارڈ کی بھی منظوری دیدی اور راشد نسیم کا ایک انوکھا ریکارڈ بھی منظور کیا جس میں انڈے کو ہوا میں اچھال کر اخروٹ کو توڑنا تھا اور پھر انڈے کو کیچ کرنا تھا۔
راشد نسیم نے جرمن ماسٹر کے ریکارڈ کو ایک منٹ میں 72 کے مقابلے میں 80 مرتبہ مرتبہ اخروٹ کو کامیابی سے توڑا اور انڈا بھی نہ ٹوٹا، راشد نسیم کے نن کیٹیگری میں ایک نیو ریکارڈ کو بھی منظور کر لیا گیا جس میں نن چکو کو ہوا میں اچھال کر دوسرے ہاتھ سے کیچ کرنا تھا، راشد نسیم ایسا 36 مرتبہ کرنے میں کامیاب رہے جبکہ راشد نسیم کو گنیز ورلڈ ریکارڈ نے 18مرتبہ کا نن چکو کو کیچ کرنے کا ٹارگٹ دیا تھا، گنیز ورلڈ ریکارڈ کی جانب سے راشد نسیم کو تصدیقی ای میل بھی موصول ہوگئی ہے جبکہ گنیز ورلڈ ریکارڈ نے تمام تفصیلات اپنی ویب سائٹ پر جاری کردی ہیں۔
کراچی کے علاقے شاہ فیصل کالونی کے رہائشی نوجوان راشد نسیم کے 2025میں سب سے زیادہ اب تک 31عالمی ریکارڈ منظور ہوچکے ہیں جبکہ وہ 2024میں بھی پاکستانی تاریخ میں 28 عالمی ریکارڈز بنا کر سر فہرست رہے تھے۔
دوسری جانب راشد نسیم نے اپنا 150واں عالمی ریکارڈ فلسطین کے نام کردیا، انہوں نے شکوہ کیا کہ پوری دنیا میں پاکستان کا نام روشن کرنے کے باوجود انکو حکومت کی جانب سے تاحال کوئی پذیرائی نہیں ملی، راشد نسیم اب تک 40 سے زیادہ مرتبہ بھارت کو شکست دے چکے ہیں، انکو امریکہ، انگلینڈ، چین، ایران اور سوئزرلینڈ و دیگر ممالک کے ریکارڈز توڑ نے کا اعزاز بھی حاصل ہے، راشد نسیم دنیا میں سب سے زیادہ پنچ کیٹیگری کے ریکارڈ بنا چکے ہیں جبکہ انکو بریکنگ، نی سٹرائیک، مارشل آرٹس ککس، سٹک، نن چکو، سکپنگ اور جمپنگ جیکس کے عالمی ریکارڈ بنانے کا اعزاز بھی حاصل ہے۔
