ترکیہ نے غزہ میں امن منصوبے کے تحت فوج تعینات کرنے پر آمادگی کا اظہار کر دیا ہے۔
ترکیہ کے وزیر خارجہ ہاکان فیدان نے ڈیووس میں ورلڈ اکنامک فورم کے موقع پر ایک خصوصی انٹرویو کے دوران کہا ہے کہ ترکیہ غزہ کیلئے تیار کئے جانیوالے امن منصوبے کے تحت فوجیوں کی تعیناتی کیلئے تیار ہے، اگر بین الاقوامی سطح پر کوئی موثر امن فریم ورک تشکیل دیا جاتا ہے تو ترکیہ اس میں عملی کردار ادا کرنے سے گریز نہیں کریگا۔
ہاکان فیدان نے کہا کہ جس طرح ترکیہ بورڈ آف پیس کا حصہ ہے اسی طرح اب وہ غزہ سے متعلق ایگزیکٹو کمیٹی میں بھی فعال کردار ادا کر رہا ہے اور انسانی امداد کی فراہمی میں نمایاں تعاون کر رہا ہے۔
انہوں نے واضح کیا کہ ترکیہ نہ صرف سفارتی سطح پر بلکہ زمینی حقائق کو بہتر بنانے کیلئے بھی اپنی ذمہ داریاں ادا کر رہا ہے۔
انکا کہنا تھا کہ ترکیہ غزہ امن منصوبے میں ہر ممکن تعاون اور بین الاقوامی استحکام فورس کا حصہ بننے کیلئے تیار ہے، غزہ میں پائیدار امن کے قیام کیلئے تمام قابل عمل آپشنز پر غور کیا جانا ضروری ہے۔
ہاکان فیدان نے اس عزم کا اظہار کیا کہ ترکیہ خطے میں دیرپا امن اور استحکام کے لیے بین الاقوامی برادری کے ساتھ مل کر ہر ممکن اقدام کرے گا۔
