تائی یوآن(شِنہوا) چین کے شمالی صوبے شنشی میں حال ہی میں بجلی کے انتظام کے مقامی عملے نے دریائے سانگ گان نیشنل وٹ لینڈ پارک میں 220 کلو وولٹ کی بجلی کی ترسیلی لائن کے ایک ٹاور کے اوپر مشرقی بگلے کا دیو ہیکل گھونسلہ دریافت کیا ہے۔
سٹیٹ گرڈ داتونگ پاور سپلائی کمپنی کے مطابق یہ گھونسلہ تقریباً 2 میٹر قطر پر مشتمل ہے اور شنشی میں پہلا موقع ہے کہ کسی مشرقی بگلے نے بجلی کے ترسیلی ٹاور پر گھونسلہ بنا کر افزائش نسل کی ہے۔
مشرقی بگلے کو بین الاقوامی ادارہ برائے تحفظ قدرت نے "خطرے سے دوچار” نسل قرار دیا ہے۔ دنیا بھر میں اس پرندے کی بالغ آبادی کی تعداد 3 ہزار سے بھی کم ہے اور چین میں یہ پہلے درجے کے قومی تحفظ میں شامل ہے۔
یہ بگلہ اپنے گھونسلے کے مقام کے انتخاب میں بہت حساس ہوتا ہے جس کے لئے خوراک کی بہتات، تحفظ اور اچھے ماحولیاتی حالات درکار ہوتے ہیں۔ بگلے کی ہجرت کے دوران اہم قیام گاہ سانگ گان دریا کا وٹ لینڈ حالیہ دنوں میں اس پرندے کے گھونسلہ بنانے کی سرگرمی کا مشاہدہ کر رہا ہے۔ یہ پیشرفت اس علاقے اور اس کے گرد و نواح میں ماحولیاتی معیار میں مسلسل بہتری کی نشاندہی کرتی ہے۔
پرندوں کے تحفظ کے لئے کمپنی نے فوری طور پر ٹاور کے اردگرد نمایاں وارننگ سائنز نصب کر دئیے ہیں۔ لائن کے معائنوں کے دوران عملہ دوربینوں اور ڈرونز کے ذریعے نگرانی کو ترجیح دیتا ہے تاکہ پرندوں کے معمولات میں کم سے کم خلل ڈالا جائے۔
