یمن میں کشیدہ صورتحال کے دوران وزیراعظم کے استعفے نے ملکی سیاست میں ہلچل مچادی ہے۔
غیر ملکی میڈیا کے مطابق وزیراعظم سالم صالح بن بریک نے اپنے عہدے سے استعفیٰ دیدیا ہے جسے یمن کی صدارتی قیادت کی کونسل نے قبول بھی کر لیا ہے، میڈیا کے مطابق وزیر خارجہ ڈاکٹر شائع محسن الزندانی کو ان کی جگہ ملک کا نیا وزیراعظم مقرر کر دیا گیا ہے، وہ بدستور وزیر خارجہ کی ذمہ داریاں بھی انجام دیتے رہیں گے۔
یہ پیشرفت ایسے وقت میں سامنے آئی ہے جب یمن کے جنوبی اور مشرقی علاقوں میں سیاسی اور سکیورٹی صورتحال مزید کشیدہ ہو گئی ہے۔
گزشتہ ماہ متحدہ عرب امارات کی حمایت یافتہ علیحدگی پسند تنظیم جنوبی عبوری کونسل نے ان علاقوں میں اپنا کنٹرول مضبوط کر لیا تھا اور سعودی عرب کی سرحد کے قریب تک پیش قدمی کی تھی، سعودی عرب نے اس پیشرفت کو اپنی قومی سلامتی کیلئے خطرہ قرار دیا تھا جبکہ خطے میں جاری کشیدگی یمن کے سیاسی مستقبل پر بھی اثر انداز ہو رہی ہے۔
